Jańaózendegi «О́zenmunaıgaz» AQ jumysshylarynyń eńbekaqysyn arttyrý týraly sheshim qabyldandy. Bul týraly «QazMunaıGaz» ulttyq kompanııasy AQ basqarma tóraǵasy Alık Aıdarbaev málim etti, dep habarlaıdy Egemen.kz.
«Bıyl 14 aqpanda Jańaózendegi «О́zenmunaıgaz» AQ-nyń burǵylaý basqarmasynyń bir top qyzmetkeri jumysyn toqtatty. Olardyń talaby jalaqyny keminde 41 paıyzǵa ósirý. Men jaǵdaıdy estigen soń, birden Jańaózenge bardym. Sol kúni «О́zenmunaıgaz» basshylyǵy jáne kásipodaq mamandarymen kelissóz júrgizildi.
Shuǵyl jıynda jumysshylardyń talaptary men ony oryndaýdyń yqtımal joldaryn talqyladyq. Sondaı-aq, basshylyqtan bólek, jumysshylarmen kezdesip, olardyń ótinish, usynystaryn tyńdadym», dedi Alık Aıdarbaev Mańǵystaý oblystyq qoǵamdyq kommýnıkasııa ortalyǵynda onlaın ótken baspasóz máslıhatynda.
Ulttyq kompanııa basshysynyń aıtýynsha, «О́zenmunaıgaz» AQ jumysshylarynan bólek, oǵan qarasty merdiger kompanııalardyń da qyzmetkerleri jalaqyny kóterýin talap etip, jumysyn toqtatqan.
«Munaıshylarmen kelissózder kúni boıy júrdi. Onyń nátıjesinde jaǵdaıdy turaqtandyrý jáne kásiporynnyń jumysyn toqtatpaý týraly kelisimge kelip, jumysshylardyń jalaqysy kóteriletin boldy. Buǵan deıin 2020 jyldyń jeltoqsan aıynda jalaqy 10 paıyzǵa artsa, endi jańa kelisim boıynsha taǵy 20 paıyzǵa arttyrý týraly kelisim jasaldy. Osylaısha bıyl jyl basynan jumysshylardyń jalaqysy 30 paıyzǵa ósetin bolady», deıdi ol.
Sondaı-aq basqarma tóraǵasy ósirilgen jalaqy kólemimen jumysshylardyń deni keliskenin aıtty.
«Degenmen keıbir jumysshylar jalaqyny 40-50 paıyzǵa kóterýdi talap etip otyr. Bizge 20 paıyzǵa arttyrý sheshimi ońaıǵa soqqan joq. Bıyl odan artyq jalaqy kóterilmeıdi, bul sońǵy sheshim. Sondyqtan jalaqyny ósirýdi talap etýshi jandardan túsinistikpen qaraýyn suraımyn», deıdi A. Aıdarbaev.