Aragidik keıbir saıttar men áleýmettik jelide nesıe keshiriledi degen aqparat jarq ete qalady. Oǵan senip, bankke qustaı ushatyn adamdar da joq emes. Árıne, bári de eńsesin basqan qaryzdan qutylǵysy-aq keledi. Biraq aldymen taralǵan aqparattyń jalǵan-shyn ekenin aıyryp alǵan abzal.
Jaqynda taǵy da osy saryndas jańalyq el ishin sharlap ketken. Jańalyqqa dereý nazar aýdarǵan Qarjy naryǵyn retteý jáne damytý agenttigi taratylyp jatqan aqparattyń dáıeksiz ekenin málimdedi.
«Osyǵan baılanysty agenttik kredıtteri boıynsha tóleý merzimi ótip ketken azamattarǵa qoldaý kórsetý úshin 2021 jylǵy qazannan bastap bereshekti retteýdiń biryńǵaı mindetti tártibi engizilgenin habarlaıdy. Kredıtter boıynsha tóleý merzimi ótip ketken jaǵdaıda qaryz alýshylar bankke nemese mıkroqarjy uıymyna ótinishpen júginýi qajet, onda olardyń ótinishteri qaralyp, problemalyq bereshekti qaıta qurylymdaý talaptary usynylady», dep habarlaıdy quzyretti organ.
Qaryzdy qaıta qurylymdaý talaptary syıaqy mólsherlemesin azaıtý; tólemdi keıinge qaldyrý; óteý ádisin ózgertý; qaryz merzimin uzartý; merzimi ótken negizgi borysh jáne (nemese) syıaqyny keshirý; aıypaqynyń (aıyppuldyń, ósimpuldyń), komıssııalardyń jáne qaryzǵa qyzmet kórsetýmen baılanysty ózge de tólemderdiń kúshin joıý jáne taǵy basqa túrde bolýy múmkin.
Eger qaryz alýshy qaryzdy qaıta qurylymdaý talaptary boıynsha kredıtormen kelisimge qol jetkize almasa, ol kredıtordyń jaýabyn alǵan kúnnen bastap 15 kún ishinde agenttikke júginýge quqyly. Bul rette qaryz alýshy bankke nemese MQU-ǵa óziniń ótinish bergenin jáne ózara utymdy sheshimge qol jetkizbegenin rastaýdy mindetti túrde usynýǵa tıis», delingen habarlamada.
Biraq elimizde ıpotekalyq qaryzdar boıynsha teńgemen alǵan ıpotekalyq nesıeni qaıta qarjylandyrý baǵdarlamasy júrgizilip jatqany belgili. Bul azamattar úshin óte tıimdi. Sebebi keshirý baǵdarlamasy aıasynda bankter azamattyń merzimi ótken bereshegin suramaıdy.
«Qazaqstanda 2004-2009 jyldar aralyǵyndaǵy kezeńde teńgemen ıpotekalyq qaryz alýshylarǵa kómek kórsetý úshin Ipotekalyq qaryzdardy qaıta qarjylandyrý baǵdarlamasyn (Baǵdarlama) iske asyrý jalǵasyp jatqanyn da habarlaımyz. Baǵdarlama sheńberinde qaryz boıynsha negizgi boryshty jyldyq 3 paıyzdan aspaıtyn syıaqy mólsherlemesimen qaıta qarjylandyrý júrgiziledi. Qaryz alýshynyń syıaqy, ósimpul (aıypaqy), aıyppuldar men komıssııalar boıynsha merzimi ótken bereshegin bankter keshirýge tıis», dep habarlaıdy agenttik mamandary.
Nesıe boıynsha aqıqat aqparat osy agenttiktiń resmı saıtynda jáne ózge de memlekettik organdar platformasynda jarııalanady. Sondyqtan dálel-deregi joq, resmı emes málimdeýlerge senbegen jón.