Pavlodarda bolǵan jol apaty saldarynan zeınetker kóz jumdy, al kúdikti oqıǵa ornynan qashyp ketken, dep habarlaıdy Egemen.kz.
«19 aqpanda saǵat 07:20-da Kosmonavttar kóshesinde Daihatsu Terios avtokóliginiń 33 jastaǵy júrgizýshisi 1948 jyly týǵan jaıaý júrginshini qaǵyp ketti. Er adam alǵan jaraqattarynan oqıǵa ornynda qaıtys boldy. Sot-medısınalyq saraptama taǵaıyndaldy. Tekserý júrgiziledi», dedi Pavlodar oblysy PD bastyǵynyń birinshi orynbasary Jasqaırat Qaıyrov.
Polısııanyń habarlaýynsha, 33 jastaǵy júrgizýshi oqıǵa ornynan qashyp ketken. Jedel-izdestirý is-sharalarynyń nátıjesinde polısııa qyzmetkerleri júrgizýshini ustady.
Avtokólik arnaıy aıyp turaǵyna qamaldy.