L.N.Gýmılev atyndaǵy Eýrazııa ulttyq ýnıversıtetindegi «Káýsar» mádenı-tanymdyq birlestiginiń uıytqy bolýymen belgili qalamger, Prezıdent syılyǵynyń laýreaty, Qazaqstannyń eńbek sińirgen qaıratkeri Qalı Sársenbaımen ádemi áserge toly oqyrmandardyń kezdesýi ótti. Mazmundy is-sharaǵa Parlament Májilisiniń depýtaty, qalamger Saýytbek Abdrahmanov, «Egemen Qazaqstan» RG» AQ basqarma tóraǵasy Darhan Qydyráli, L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov, «Turan» ýnıversıtetiniń rektory Rahman Alshanov, Qazaqstan Jazýshylar odaǵy basqarmasy tóraǵasynyń orynbasary, jazýshy Mereke Qulkenov, satırık Kópen Ámirbek, pýblısıster Janbolat Aýpbaev pen Sharhan Qazyǵul jáne aqyndar Ǵalym Jaılybaı men Qasymhan Begmanov bastaǵan bir top zııaly qaýym ókilderi qatysty.
«Káýsar» mádenı-tanymdyq birlestiginiń jetekshisi, Qazaqstannyń eńbek sińirgen ártisi, professor Kenjeǵalı Myrjyqbaı buǵan deıin de atalǵan oqý ornynda halqymyzdyń birtýar tulǵalarymen birneshe kezdesý ótkizgeni belgili. Sonyń jarasymdy jalǵasy retinde ótken kesh shymyldyǵyn ánshi aǵamyz ásem ánmen ashsa, stýdentter parasatty pýblısıstiń shyǵarmalarynan úzindi oqyp, jınalǵandardy jyly shýaqqa bóledi.
Jalpy qazaq oqyrmandary estet qalamger Qalı Sársenbaıdy jaqsy biledi. Ol sonaý sekseninshi jyldardan beri merzimdi baspasóz betinde qoǵamnyń san taraý ózekti máselesin qozǵap, ult óneriniń kókjıegin keńeıtken tulǵalar týraly jazǵan oıly maqalalarymen kópshilikke tanyldy. Uzaq jyldar «Jas alash», «Egemen Qazaqstan», «Parasat», «Almaty aqshamy» sekildi gazet-jýrnaldarda qyzmet istep, qazaq baspasóziniń damýyna úles qosty. Qazir «Ana tili» gazetiniń bas redaktory, pýblısıstıkalyq, prozalyq kitaptary jaryq kórgen.
Qazaqstannyń halyq jazýshysy Qadyr Myrza Álı «Kórkemónerdi kórkem jigitter jasaıdy» degen maqalasynda: «Qalı ne nárseni jazsa da, bilip jazady. Bilip jazý úshin aldymen Qudaı beretin jazǵyshtyq qasıetti aıtpaǵanda, bilimpazdyq, izdenimpazdyq jáne kerek. Bul krıterııler bolmasa, álgi qasıetti ustap turý bekershilik. Osy oraıda Qalıdyń estettik álemine basa nazar aýdarǵan bolar edim. Kúndelikti shyǵyp jatqan gazette aǵymdyq máselelerge ilesip otyrýy, oı ushqyrlyǵyn tanytýy óz aldyna, onyń tereń tolǵanystarǵa qurylǵan dúnıeleri maǵan áldeqaıda qymbat kórinedi» dep talantty jýrnalıstiń eńbegin joǵary baǵalaǵan.
Kezdesý barysynda kesh ıesi oqyrmandarmen oı bólisip, erkin pikir almasty. Jýrnalıstıkaǵa qalaı kelgeni jaıynda qyzyqty áńgime aıtyp, esimderi el esinde qalǵan Sherhan Murtaza, Kamal Smaıylov, Oralhan Bókeı, Amangeldi Sembın týraly maǵynaly estelik órbitti. Keıingi jazyp júrgen oı-tolǵanystaryn oqyp, jastardyń suraqtaryna jaýap berdi. Sonymen qatar ózi basqaryp otyrǵan «Ana tili» gazetinde qolǵa alǵan jobalary jaıynda áńgimeledi.
− Ulttyń muńyn muńdap, joǵyn joqtap júrgen ult basylymdary sanaýly. Sonyń biri – «Ana tili» gazeti. Osynda otyrǵandardyń barlyǵyn bizdiń basylymnyń oqyrmandary dep bilemin. Negizi, halyqty tárbıeleýdiń túri kóp, sonyń ishinde ózim tulǵataný arqyly tárbıeleýdi jón kóremin. Osy baǵytta biraz jobany qolǵa alyp, «Tulǵa-taǵdyr», «Aǵalar aıtyp ketipti», «Arystar men aǵystar» atty aıdarlardy ashtyq. Aldaǵy naýryzdan bastap, ataqty akter Asanáli Áshimovtiń jańa jazyp bitirgen kitabynan úzindiler jarııalaımyz, − deı kelip, osy keshtiń ótýine muryndyq bolǵan azamattarǵa rızashylyǵyn jetkizdi.
Sondaı-aq kesh aıasynda avtordyń «Túngi qoıylym» jáne «Dúldúl» atty qos kitabynyń tanystyrylymy ótip, satırık Kópen Ámirbek bir sapta júrgen qalamdasy týraly izgi lebizin bildirdi. Kezdesý sońynda ýnıversıtet rektory, akademık Erlan Sydyqov Qalı Sársenbaıǵa ǵylymı keńestiń sheshimimen atalǵan oqý ornynyń «Kúltegin» medalin tabys etti.