Premer-mınıstr Álıhan Smaıylov Eýrazııalyq úkimetaralyq keńes otyrysy aıasynda Eýrazııalyq ekonomıkalyq komıssııa alqasynyń tóraǵasy Mıhaıl Mıasnıkovıchpen kelissóz júrgizdi, dep habarlaıdy Egemen.kz.
Kezdesý barysynda Eýrazııalyq ekonomıkalyq ıntegrasııany damytýdyń 2025 jylǵa deıingi strategııalyq baǵyttarynyń jobasyn daıyndaý barysy, EAEO sheńberinde tehnıkalyq retteýdiń biryńǵaı bazasyn jetildirý, sondaı-aq Eýrazııalyq Úkimetaralyq keńestiń aldaǵy otyrysyn ótkizý máseleleri talqylandy. Á. Smaıylovtyń aıtýynsha, ózara tıimdi sheshimder qabyldaýǵa basymdyq berý uıymnyń baǵytyna tolyq sáıkes keledi, muny Uıym jumys istegen kezeńde ózara saýdanyń edáýir ósýi naqty kórsetip otyr.
Máselen, EAEO qyzmeti kezeńde Qazaqstannyń áriptesterimen ózara saýdasy 37,5%-ǵa, onyń ishinde eksport 33%-ǵa ósti.
«Bizdiń aldymyzda túrli salalardaǵy, birinshi kezekte ónerkásiptegi kooperasııa kásiporyndarmen birlesip ıntegrasııalyq jobalardy iske asyrý boıynsha úlken jumys kútip tur. О́tken jyly Qazaqstan EAEO-nyń jarǵylyq organdarynda tóraǵalyq etýshi tarap boldy. Bizdiń memleket basshymyz Q. Toqaev ótken jyldyń basynda bizdiń uıymǵa tóraǵalyq etýimizdiń basym baǵyttaryn belgiledi, Prezıdenttiń úndeýinde kórsetilgen osy baǵyttar birlesken kúsh-jigerimizdiń arqasynda sol kezeńde tabysty iske asyryldy dep senimmen aıtýǵa bolady jáne bıylǵy jyly olardy júzege asyrý jalǵasýda», Á. Smaıylov.
Qazaqstan men EAEO elderi arasyndaǵy taýar aınalymy 2021 jyly 26,1 mıllıard dollar boldy, bul 2020 jylǵa qaraǵanda 28 paıyzǵa joǵary. Qazaqstannan EAEO elderine eksport 2021 jyly 34,9 paıyz dollarǵa ósip, 7,6 mıllıard dollarǵa jetti. EAEO elderinen Qazaqstanǵa ımport 2021 jyly 25,4 paıyzǵa ósip, 18,4 mıllıard dollar boldy.