Qazaq oǵlany Jánibek Álimhanulymen sharshy alańda kezdeskisi kelmegen AQSh boksshysy Demetrıýs Andradeniń jańa salmaqtaǵy alǵashqy qarsylasy anyqtaldy, dep habarlaıdy Egemen.kz.
Ekinshi orta salmaq dárejesinde baq synaýǵa bel býǵan Demetrıýs Andrade 21 mamyr kúni ulybrıtanııalyq Zak Parkerge qarsy sharshy alańǵa shyǵatyn boldy. Bul týraly boksshynyń promoýteri Frenk Ýorren aqparat taratty. Eki boksshy ekinshi orta salmaq dárejesindegi WBO tujyrymy boıynsha álemniń ýaqytsha chempıony ataǵyn sarapqa salady. Jeńiske jetkeni álemniń absolıýtti chempıony Saýl Alvarestiń mindetti qarsylasy atanady.