2022 jyldyń qańtarynda aqsha aýdarymy júıesi arqyly Qazaqstannan jiberilgen qarjy kólemi 45,6 mlrd teńgeni qurady. Bul – 2021 jyldyń qańtarymen salystyrǵanda 16,3 paıyzǵa az. Tranzaksııa sany 150 myńnan 100,5 myńǵa deıin azaıǵan.
Qańtar aıynda aýdarymdardyń basym bóligi, ıaǵnı 82,5 paıyzy dollarmen jasalǵan. Bir jyl buryn bul kórsetkish 73,6 paıyzdy quraǵan eken. Al bes jyl buryn 61,4 paıyzdy quraǵan bolatyn. Rýblmen aýdarym jasaý jyldan-jylǵa azaıyp kele jatyr. 2022 jyldyń qańtarynda rýbldiń úlesi 10,8 paıyz bolǵan. Ulttyq valıýtamen aýdarymdy júzege asyrý sońǵy bir jylda 11,9-den 5,7 paıyzǵa, al eýromen qarjy jiberý 1,2-den 1 paıyzǵa tómendegen.
Aqsha aýdarymy júıesi arqyly Qazaqstannan jiberilgen bir aýdarymnyń ortasha chegi ulttyq valıýtada 142,7 myńnan 140,6 myńǵa azaıǵan. Reseı rýblinde – 59,8-den 50,9 myńǵa, eýroda – 1 218-den 1 155 eýroǵa qysqarý baıqalady. Al dollarda – 1 165-ten 1 355 dollarǵa ósken.
Barlyq aýdarymnyń teń jartysynan astamy úsh elge tıesili eken: Túrkııa (10,4 mlrd teńge), О́zbekstan (9,3 mlrd teńge) jáne Qyrǵyzstan (8,3 mlrd teńge). Sondaı-aq 7,2 mlrd teńge Reseıge jiberilgen, biraq bul soma byltyrǵydan áldeqaıda az jáne ol kezde Qazaqstannan aqsha alýdan Reseı kósh bastap turǵan. Al bıyl alǵashqy úshtikke de kirmeı qalǵanyn baıqaımyz.
Bul rette, Qazaqstan Respýblıkasy qolma-qol shetel valıýtasyn jáne 10 myń dollardan asatyn shetel valıýtasyndaǵy aqsha quraldaryn, sondaı-aq altyn quımalaryn, ınvestısııalyq monetalardy eksporttaýǵa shekteý engizgendikten aýdarym tanymaldylyǵy budan da arta túsýi múmkin dep boljaıdy mamandar.