Qolóner sheberhanalary men mýzeılerden ǵana kezdestirip júrgen sándik qoldanbaly óner týyndylaryna sońǵy jyldary suranys artyp keledi. Etnoóndiris quny qymbat bolǵanymen, tabıǵı ónimder sheberler qolynan jańa tynys alyp, zamanaýı qoǵam qajetine jarap-aq tur.
Á.Qasteev atyndaǵy Qoldanbaly óner bóliminiń aǵa ǵylymı qyzmetkeri, Qazaqstan Sýretshiler odaǵynyń múshesi Natalııa Bajenova qazaqtyń qoldanbaly jáne dástúrli toqyma óneriniń zerttelý barysyna toqtalyp, elimizdiń óńirlerinen jyldar boıy jınaqtalǵan 500-ge jýyq óner toptamasyn tanystyrdy.
Búginde tutynýshysyn tamsantqysy keletin kásipkerler qolóner buıymdaryn saraılar men meıramhanalardyń sánine aınaldyrsa, sán álemi bul baǵytta erekshe úlgilerge nazar aýdarýda. Al mýzeı muraǵatyndaǵy myna jádigerlerdiń syry tereńde jatyr. Tuskıiz, syrmaq, tekemet pen kilemderdiń júzden astam túrleri, sondaı-aq aıaqqap, atjabý, kermeqap, keseqap, jaınamaz sııaqty kúndelikti qoldanysta sırek kezdesetin sándik-qoldanbaly óner buıymdarynyń ǵylymı derekteri kóne ǵasyrlarǵa tán.
Birneshe ónerdiń kıiz, mata betinde qabysýy, árıne tańdanys týdyrmaı qoımaıdy. Túrki halyqtarynyń kúndelikti turmysynyń sáni men saltanatyna aınalǵan buıymdardyń zamanaýı kórme keńistiginde ınklıýzıvti jobalar aıasynda kórinis tabýy qoǵam qajettiliginen týyndap otyr.
Kózimen kóre almaǵanmen, túrli tústi álemniń ásemdigin saýsaq ushymen ǵana sezine alatyn zaǵıp jandarǵa arnalǵan alaqandaı tekemettiń birneshe túrin Qoldanbaly óner bóliminiń mamandary toqyǵan. Zaǵıp jandar úshin arnaıy uıymdastyrylǵan toptamany torsyq, qobyz, shıge salynǵan órnek kilem sııaqty oıýmen kómkerilgen buıymdar tolyqtyryp tur.
Natalııa Bajenova atap ótkendeı, kelýshilerdi ulttyq buıymdardyń jasalý, toqylý ádisteri, óndiriste qoldanylǵan ónimder men óńdeý barysy qyzyqtyrady. Ásirese, mýzeı eksponattarynyń mektep oqýshylary úshin berer maǵlumaty mol.
ALMATY