QR Prezıdenti Ákimshiliginiń birinshi orynbasary Tımýr Súleımenov pen Prezıdent Ákimshiligi Basshysynyń orynbasary – Prezıdenttiń halyqaralyq yntymaqtastyq jónindegi arnaýly ókili Erjan Qazyhan osy aptanyń basynda Brıýsselge jumys saparymen bardy, dep habarlaıdy Egemen.kz.
Eýropa Odaǵynyń joǵary laýazymdy ókildermen ótken kelissózder barysynda Qazaqstan men Eýroodaq arasyndaǵy saýda, energetıka, kólik, qarjy jáne aýyl sharýashylyǵy salalaryndaǵy yntymaqtastyqty keńeıtý máseleleri qarastyryldy.
Sapar barysynda saýda máseleleri jónindegi Eýropalyq komıssııanyń Vıse-prezıdenti Valdıs Dombrovskıspen, Kólik jónindegi eýrokomıssar Adına Valeanmen, Aýyl sharýashylyǵy jónindegi Eýrokomıssar Iаnýsh Voısehovskıımen, sondaı-aq energetıka jáne qarjylyq turaqtylyq jónindegi «FISMA» Dırektorattardyń basshylyǵymen resmı kezdesýler ótkizildi. Sonymen qatar Eýropalyq keńes pen Eýropalyq syrtqy is-qımyl qyzmetiniń basshylyǵymen kelissózder júrgizildi.
Taraptar Qazaqstan Prezıdenti Qasym-Jomart Toqaevtyń 2021 jylǵy qarashadaǵy Brıýsselge sapary ekijaqty jáne kópjaqty yqpaldastyqtyń barlyq baǵyty boıynsha Qazaqstan-Eýropa yntymaqtastyǵyn jandandyrýǵa tyń serpin berdi degen pikirge keldi. Osy rette Eýropalyq keńestiń basshylyǵyna ekinshi merzimge qaıta saılanýyna baılanysty Eýropalyq keńes Prezıdenti Sharl Mıshelge Memleket basshysynyń jeke joldaý haty tabys etildi.
Qazaqstandyq tarap qazirgi halyqaralyq jaǵdaıǵa mán bere otyryp, Keńeıtilgen seriktestik pen yntymaqtastyq týraly kelisimdi júzege asyrý aıasynda Qazaqstan men Eýropa Odaǵy arasyndaǵy ózara is-qımyldy keńeıtý jáne odan ári nyǵaıtý jónindegi naqty sharalarǵa arnaıy toqtaldy. Atap aıtqanda, sanksııalardyń Qazaqstan ekonomıkasyna janama keri áserin barynsha azaıtý jáne boldyrmaý qajettigine eýropalyq seriktesterdiń nazaryn aýdardy. Eýropalyq tarap Qazaqstannyń alańdaýshylyǵyna tolyq túsinistik tanytyp, bul másele boıynsha barynsha qoldaý kórsetýge daıyn ekenin málimdedi.
Sonymen qatar eýropalyq tarap Qazaqstan Prezıdenti jarııalaǵan saıası jáne ekonomıkalyq reformalarǵa aıtarlyqtaı qyzyǵýshylyq tanytty. Osyǵan baılanysty Eýropa Odaǵynyń ókilderi Qasym-Jomart Toqaevtyń jaqynda Qazaqstan halqyna arnaǵan Joldaýynyń negizgi tezısterimen egjeı-tegjeıli tanysyp, Memleket basshysynyń bastamalaryn oń baǵalap, Eýropa Odaǵynyń túrli quraldary arqyly turaqty damý, quqyq ústemdigi baǵytynda olardy iske asyrýǵa qoldaý kórsetýge daıyn ekendigin málimdedi. Budan bólek Joldaýda aıtylǵan saıası reformalardyń is júzinde oryndalýy elimizdi odan ári saıası jańǵyrtýǵa jáne Qazaqstan men Eýropalyq Odaq arasyndaǵy yntymaqtastyqty nyǵaıtýǵa yqpal etetini atap ótildi.