Túrkistan oblysynda qoımadan 10 mıllıon teńgeniń taýaryn urlaǵan kúdikti ustaldy. Ol Qazyǵurt aýdanynyń turǵyny bolyp shyqty, dep habarlaıdy Egemen.kz.
Oblystyq polısııa departamentiniń málimetinshe, Saıram aýdandyq polısııa bólimine kıim-keshek óndirýmen aınalysatyn jeke kásipkerden aryz túsken.
«Er adam Batys Eýropa–Batys Qytaı tas jolynyń boıynda ornalasqan kıim qoımasynan taýardyń bir bóligi joǵalyp ketkenin túsindirdi. Jábirlenýshige keltirilgen shyǵynnyń jalpy somasy shamamen – 10 mıllıon teńge», dedi Túrkistan oblysy Polısııa departamentiniń baspasóz qyzmeti.
Polısııa bul faktini Sotqa deıingi tergeýlerdiń biryńǵaı tizilimine QR Qylmystyq kodeksiniń 188-baby boıynsha tirkedi.
«Jedel ýákilder qoımaǵa barǵanda jol boıynan er adamdy ustady. Ol urlanǵan taýardy kólikke tıep, qashyp ketpekshi bolǵan. Qazyǵurt aýdanynyń turǵyny, jábirlenýshiniń júk kóligin aıdaǵan qyzmetkeri ekeni anyqtaldy», dep qosy baspasóz qyzmeti.
Kúdikti Saıram aýdanynda jumys istep júrip, buryn úsh ret basqa adamnyń múlkin urlaǵan.
«Birinshi jaǵdaıda ol jaryqtyń joqtyǵynan beınebaqylaý kameralarynyń óship qalǵanyn paıdalanyp, eki qap kıim-keshek urlap ketken. Keıin er adam urlanǵan múlkin Shymkentte satyp jibergen. Keıingi eki jaǵdaıda qylmysker beınebaqylaý kamerasyn óshirip, «ońaı aqsha» tabý úshin múlikterdi urlaǵan. Kúdikti urlanǵan kıimderdi 3 mıllıon teńgege satyp, aqshany óz qajetine jumsaǵan», dep málimdedi Túrkistan oblysy Polısııa departamenti.
Qazir kúdiktige qatysty «bótenniń múlkin urlaý» baby boıynsha sotqa deıingi tergeý amaly júrgizilip jatyr. Tergeý barysynda er adamnyń osyǵan uqsas basqa da qylmystarǵa qatysy bar ekeni anyqtalǵan.