Jambyl oblysynyń ákimi Nurjan Nurjigitov Qasym-Jomart Toqaevqa bıylǵy úsh aıdaǵy óńirdiń damý kórsetkishteri men júktelgen tapsyrmalarynyń oryndalý barysy jaıly baıandady, dep habarlaıdy Egemen.kz Aqordaǵa silteme jasap.
Oblys ákiminiń aıtýynsha, óńirge tartylǵan ınvestısııa kólemi 63,1 mıllıard teńgege jetken. Sonymen qatar, bıyl óńirde quny 100,5 mıllıard teńge bolatyn 15 ınvestısııalyq joba iske asyrylyp, 1000-nan astam jumys orny ashylady dep josparlanyp otyr. 2025 jylǵa deıin 75 ınvestısııalyq joba júzege asyrylady.
Nurjan Nurjigitov Memleket basshysyna 2022 jyly Jambyl oblysynda 810 myń sharshy metr turǵyn úı salynyp, 25 eldi mekenge aýyzsý, 17 aýylǵa gaz tartylatyny jóninde málimet berdi. Sonymen qatar óńirdegi egis alqaby 9,2 myń gektarǵa ulǵaıtylyp, aýyl sharýashylyǵy tehnıkasy 11 paıyzǵa jańartylatynyn aıtty. О́ńir basshysynyń aıtýynsha, Prezıdent tapsyrmasyna sáıkes áleýmettik mańyzy bar taýarlardyń baǵasyn turaqtandyrý jumystary júıeli túrde atqarylyp jatyr. Sondaı-aq Gvardeısk aýylyndaǵy Bıologııalyq qaýipsizdik problemalary jónindegi ǵylymı-zertteý ınstıtýtynyń bazasynda otandyq ımmýndyq preparattar shyǵaratyn zaýyttyń jumysy, «BSL-3» óndiristik sehynyń qurylysy jóninde de esep berildi.
Memleket basshysy baǵany baqylaýda ustaý, halyqtyń tabysyn arttyrý, ınvestısııa tartý jáne memlekettik baǵdarlamalardy tıimdi júzege asyrý jumystaryn jandandyrý jóninde naqty tapsyrmalar berdi.