Alaıaqtar ózderin Ulttyq bank qyzmetkeri retinde tanystyryp, qazaqstandyqtardyń jeke derekterin bilip alýǵa tyrysady, dep habarlaıdy Egemen.kz.
Ulttyq banktiń málimetinshe, olar ártúrli syltaýmen azamattardy smartfonyna banktiń mobıldi qosymshasyn nemese qashyqtan basqarýǵa arnalǵan servısti ornatýǵa úgitteıdi.
«Osydan keıin qaskóıler smartfondy qashyqtan tolyq basqarýǵa múmkindik alady: shot ashady, kredıt rásimdeıdi jáne aqsha urlaıdy. Telefon arqyly sóılesý kezinde derbes ári jabyq derekterdi (shotta saqtaýly somany, SMS pen CVV kodtardy) berýdi talap etedi», dep eskertti Ulttyq bank. Azamattardyń jeke derekterine qol jetkizý úshin alaıaqtar neshe túrli qıturqy áreketterge barady. Olar Ulttyq bank qyzmetkeriniń jeke basyn rastaıtyn qujattardy, sondaı-aq aqshalaı operasııalar boıynsha hattardy nemese anyqtamalardy qoldan jasaıdy. «Ulttyq bank jeke tulǵanyń shotyna qyzmet kórsetpeıdi, jeke tulǵalarmen aqshalaı esep aıyrysý men mámileler jasaspaıdy. Qazaqstan azamatynyń shotyna qatysty qandaı da bir alaıaqtyq áreket, derbes derekterdiń jarııa etilýi jáne ekinshi deńgeıli bankterde nesıe resimdeý sekildi máseleler boıynsha jeke tulǵalarǵa qońyraý shalmaıdy», dep málimdedi Ulttyq bank. Ulttyq banktegi shottar tek qana Ulttyq banktiń, ekinshi deńgeıli bankterdiń jáne sany shekteýli zańdy tulǵalardyń operasııalaryn esepke alý úshin ǵana ashylýy múmkin.- «Ulttyq bankten» kúmándi hat nemese osyǵan uqsas qońyraý qabyldasańyz, mindetti túrde quqyq qorǵaý organdaryna habar berińiz, - dep keńes berdi vedomstvo.