Aqparattar aǵyny

● «QazAgro» kóktemgi jáne kúzgi dala jumystary úshin 61,6 mlrd. teńge bóledi. Sonyń ishinde qarjylandyrýdyń negizgi bóligi bolyp tabylatyn bıýdjettik nesıe 40 mlrd. teńgeni quraıdy. Vedomstvo sondaı-aq alǵashqy ret kóktemgi egis jumystaryn ekinshi deńgeıli bankter arqyly qarjylandyryp,  bul maqsatqa 20 mlrd.teńge qarastyrady. ● «Bıznestiń jol kartasy-2020» baǵ­dar­lamasy boıynsha kómek qarjy alatyn kom­panııalardyń sany 3600-ge jetti. Bul tý­ra­­ly keshe Almatyda ótken baspasóz máslı­hatyn­da «Damý» kásipkerlikti damytý qory» AQ bas­qar­masynyń tóraıymy Lázzat Ibragımova málimdedi. Onyń aıtýynsha, baǵdarlamada óndirýshi jáne óńdeýshi kompanııalarǵa basymdyq beriledi. ● Qostanaı óńirinde bıyl 12 ınves­tı­sııa­­lyq joba iske asyrylady. Oblystyq kásip­kerlik jáne ındýstrııalyq ınnovasııalyq damý bas­qarmasy basshysynyń orynbasary Gúlnár Ábe­novanyń málimetinshe, búginde 80 jo­banyń 69-y iske qosylǵan.  Sonyń nátı­jesinde somasy 100 mlrd.  teńgelik 4 myńnan astam ju­mys orny ashyl­ǵan. ● Shyǵys Qazaqstan oblysynda aýadan qýat alatyn qondyrǵy ómirge keldi. Ony oı­lap tap­qan jergilikti ónertapqysh Mıhaıl Býl­dakov «Shaǵyn EKSPO-2014» kórmesine osy jo­ba­­­ny usynyp, mamandardyń joǵary baǵasyn aldy. ● Shymkentte «Teatr kóktemi-2014» ob­lys­tyq kásibı teatr festıvali márege jetti. Oǵan oblystaǵy 8 kásibı teatr qatysyp, 8 nomınasııa boıynsha jarysqa tústi. Qorytyndyda oblystyq ázil-syqaq jáne satıra, oblystyq opera jáne balet teatrlarynyń ujymdary bas báıgelerge qol jetkizdi. ● Qyzylorda oblysy Syrdarııa aýdanynda 402 sý nysany kommýnaldyq men­shik­ke qaı­­ta ótkizildi. Aýdandyq prokýratýra qyz­met­­ker­­leriniń bastamasymen júrgizilgen bul shara jaramdy jáne qaıta jańǵyrtýǵa jatatyn qon­dyr­ǵylardy aýyl sharýashylyǵynyń múd­desi úshin tıimdi paıdalaný maqsatynda jasalyp otyr. ● Aqtaýda 200 jas otbasy jańa páterlerdiń kiltterine ıe boldy. «Qoljetimdi turǵyn úı-2020» baǵdarlamasy boıynsha paıdalanýǵa berilgen bul úılerdiń kiltin tabys etken Mańǵystaý oblysynyń ákimi Alık Aıdarbaev aldaǵy ýaqytta atalmysh joba negizinde salynatyn jaılar sanynyń kúrt artatynyn aıtty. ● Qazaqstanda «Skat» áýe kompanııasynyń jumysyn tekserý bastaldy. Bul jumystardy qolǵa alǵan Kólik jáne kommýnıkasııa mınıstr­liginiń azamattyq avıasııa komıteti sońǵy ýa­qyt­ta jıilep ketken tótenshe jaǵdaılardyń sebep­terin anyqtaıdy. Eske sala ketsek, 7 sáýirde avıa­kompanııanyń Shymkentten ushyp kelgen «Boıng-737» ushaǵy Astana áýejaıyna apattyq jaǵ­daıda qonǵan edi. 24KZ, BNews.kz, Nur.kz, Egemen.kz habarlary boıynsha daıyndaldy.