Osydan eki jyl buryn jeke kásipker Vıtalıı Mıhaılov burynǵy balabaqshany óz ıeligine satyp alyp, búldirshinderdiń jekemenshik mekemesine aınaldyrǵan bolatyn. Alaıda, sońǵy kezderi jospardan tys túrli tekserýlerdiń saldarynan temirdeı júıkesi syr bere bastaǵan. Jumystan da bereke ketip, jumysshy-qyzmetkerler men ata-analar arasynda qolaısyz ahýal ornyqqan. Quzyrly oryndar tarapynan jón-josyqsyz talaptar údep bara jatqannan keıin kásipker qorǵanýdyń amalyna kirisken. Oblystyq kásipkerler palatasyna shaǵymdanyp, istiń aq-qarasyn anyqtap berýdi ótingen. Oǵan joldaǵan hatynda «Balapan» baǵdarlamasy sheńberinde bóbekjaı-balabaqsha ashqanyn, 366 sharshy metr aýmaqty qamtıtyn ǵımaratty qalpyna keltirý úshin birneshe ret nesıe alǵanyn, mekemeniń ishi-syrty talaptarǵa saı tolyq jabdyqtalǵanyna qaramastan maǵynasy joq tekseristerden kóz ashpaı otyrǵanyn jaza kelip, arasha suraǵan.
Keıin málim bolǵandaı, kıkiljiń daýdyń tutanýy bir ata-ananyń balabaqshanyń ishki erejesin óreskel buzýynan bastalǵan. Olar erketotaı balasyn keshiktirip ákelýdi ádetke aınaldyrǵan. Tárbıeshiniń eskertýine dóreki túrde jaýap berip, onyń aqyry qoqan-loqyǵa ulasqan. Sol-aq eken, sandaltqan san tekseris qaptap qoıa bergen. Aldymen sanıtarlyq-epıdemıologııalyq qadaǵalaý basqarmasy kárin tókken. Ár toptyń jeke jýynatyn bólmesi bolýy shart degen ýájdi kóldeneń tartyp, 4 toptyń ornyna 48 orynǵa shaqtalǵan 2 top ashýǵa ǵana ruqsat bergen. Basqa mektepke deıingi balalar mekemelerinde osy erejeni buzǵan is-áreketterge kóz juma qaraǵan. «Ala qoıdy bóle qyryqqandaı» ábden kúzegenge uqsaıdy. Bir tekseristiń izi sýymaı jatyp bilim salasyndaǵy baqylaý departamenti saıtandaı sap ete qalyp, jan alatyn ázireıilshe shúılikken. Dırektordyń eńbek demalysynan shyǵýyn kútpesten dúnıe kúıip bara jatqandaı «shash al dese, bas alatynnyń» kerin keltirgen. «Qyraǵy kózder» oqytý josparynda birneshe sabaq boıynsha artyq ýaqyt qosylǵanyn «baıqap» qalyp, bóbekjaı-baqshanyń meńgerýshisine 37 myń teńge aıyppul tóleýdi mindettegen. Joǵary bilimdi eki pedagog qaıta daıarlaý kýrstarynan ótpedi dep dırektordyń ústinen sotqa shaǵymdanǵan. Joǵary bilimdi mamandardyń jumysqa jańa qabyldanǵanyn, kýrstarǵa jazylyp qoıǵandaryn qulaqtaryna da ilmegen. Beıne bir jaý shapqandaı apaı-topaıyn shyǵarǵan. Otyz jyldyq eńbek ótili bar meńgerýshi orynsyz qysymǵa tótep bere almasa kerek, jumystan ketýge aryz bergen. Keı ata-analar senimsizdik kórsetip, balalaryn alyp ketken.
Jaı oǵyndaı jarqyldap tótenshe jaǵdaılar jónindegi departament jetip kelgende bódenedeı buǵyp qalǵan mundaǵylarda ıman-záre qalmaǵan. Eshqandaı zańsyzdyq tappasa da aldyn apyryp, janyn japyryp ketkenge uqsaıdy. Salyq departamenti tekseris júrgizetini týraly úshbý sálem joldaǵanda ábden tózimi de, shydamy da taýsylǵan V. Mıhaılov Kásipkerler palatasyna qaırylýǵa májbúr bolǵan. Shaǵym ózara yntymaqtastyq týraly memorandýmǵa sáıkes oblystyq prokýratýraǵa jiberilgen. Egjeı-tegjeıli tekseris qorytyndysy negizinde jospardan tys ári zańsyz beıberekettikke jol berdi degen sheshim qabyldanǵan. Birqatar tulǵalar ákimshilik jazaǵa tartylǵan.
Búginde Vıtalııdiń uıqysy túzý, kóńili tynysh. Ol bárinen buryn Elbasy Jarlyǵymen qabyldanǵan orta jáne shaǵyn bıznes qyzmeti úshin jaǵdaıdy jaqsartý týraly sharalar ishinde negizsiz tekserýlerge moratorıı jarııalanǵanyna dán rıza.
О́mir ESQALI,
«Egemen Qazaqstan».
Soltústik Qazaqstan oblysy.