Májilistiń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgeristerdi qabyldady, dep habarlaıdy Egemen.kz.
«Senattyń túzetýleri balaǵa zııan keltiretin, tyıym salynǵan nemese basqa da shektelgen aqparatty ornalastyrýǵa jol bergen ınternet resýrstarmen memlekettik organdardyń ózara is-qımyl jasaý tetigin ózgertýge baǵyttalǵan. Senat depýtattary BAQ salasyndaǵy ýákiletti organǵa balaǵa qatysty kıberbýllıng faktileri boıynsha saraptama júrgizý tártibin aıqyndaý jóninde quzyret berýdi, sondaı-aq ınternet-resýrstarǵa qol jetkizýdi toqtata turýǵa negiz retinde kıberbýllıng faktilerin zańnamalyq túrde aıqyndaýdy usyndy. Bul rette zań jobasynan ýákiletti organnyń tyıym salynǵan aqparatqa qol jetkizýdi shekteý tártibin aıqyndaý jónindegi quzyreti alynyp tastaldy. Senat usynǵan ózgerister men tolyqtyrýlar Májilis maquldaǵan zań jobasynyń tujyrymdamasy men mazmunyn ózgertpeıdi», dep túsindirdi Májilistiń Áleýmettik-mádenı damý komıtetiniń tóraǵasy Jámılá Nurmanbetova.
Palata depýtattary atalǵan ózgeristerge qoldaý bildirdi.