Pavlodarda mektepte órt shyǵyp, 15 jastaǵy oqýshy zardap shekti. Tótenshe jaǵdaıdan keıin oqýshy qyz bas aýrýyna shaǵymdanǵan. Jedel járdem ony aýrýhanaǵa jetkizdi, dep habarlaıdy Egemen.kz.
«21 sáýirde saǵat 19.28-de Pavlodar qalasyndaǵy oblystyq balalar aýrýhanasyna 2007 jyly týǵan 8 «B» synyp oqýshysy júgindi. О́rt kezinde ol sabaqta bolǵan. Evakýasııadan keıin úıine qaıtqan, al keshke jaǵdaıy nasharlaǵan», dedi oblystyq Bilim basqarmasy ókilderi.
Muǵalimderdiń aıtýynsha, zardap shegýshi kómirqyshqyl gazyna ýlanyp qalýy múmkin. Oblystyq Densaýlyq saqtaý basqarmasy málimetinshe, qyz somatıkalyq bólimde jatyr.
«Bala ınfýzıon terapııa alyp jatyr. Jaǵdaıy turaqty», dedi vedomstvo ókilderi.
Buǵan deıin 47 jastaǵy fızıka pániniń muǵalimi órtten zardap shekkeni habarlanǵan bolatyn. Kómirqyshqyl gazynan ýlanǵan áıel aýrýhanaǵa jetkizilgen.