Bıyl memleket jáne qoǵam qaıratkeri, kórnekti aqyn Kákimbek Salyqovtyń týǵanyna 90 jyl toldy. Osyǵan oraı astanadaǵy aıtýly tulǵanyń turǵan úıine eskertkish taqta ornatyldy. Mazmundy sharaǵa Aqmola, Qaraǵandy, Soltústik Qazaqstan oblysynan kelgen qonaqtar men zııaly qaýym ókilderi qatysty.
Eskertkish taqtanyń saltanatty ashylýyn Nur-Sultan qalasy əkiminiń orynbasary Ermek Qızatov pen aqynnyń qyzy Maıra Kákimbekqyzy atqardy. Odan keıin sóz alǵan Ermek Qızatov tirlikte ónegeli izi qalǵan birtýar azamat týraly salmaqty oı qozǵap, týǵan halqynyń jaqsylyǵyn talmaı jyrlaǵan aqynnyń ómiri Otandy súıýdiń úlgisi bolǵandyǵyn aıtty.
Is-sharada Soltústik Qazaqstan oblysynyń ákimi Qumar Aqsaqalovtyń quttyqtaýyn onyń orynbasary Ǵanı Nyǵmetov oqyp berse, Qaraǵandy oblysynyń ákimi Jeńis Qasymbektiń sálemin orynbasary Erbol Áliqulov jetkizdi. Sondaı-aq Aqmola oblysynan kelgen delegasııa ókili Jabal Erǵalıev Kákimbek Salyqovtyń el kóńilinde Oqjetpestiń bıigi bolyp qalǵandyǵyn baıandady.
− Soltústik Qazaqstan men Aqmola oblysy Kákimbek aǵamyzdy áli kúnge deıin bir-birimizden qyzǵanyp, óz baýyrymyzǵa tartyp júremiz. Sony biletin ol kisi «Esil-Kókshe men úshin ortaq meken, Ekeýi de meniń óz elim» dep jyrlady. Poezııamyzdyń jezkıigi atanǵan aqynnyń ár óleńine elimizdiń bar kompozıtory qumar boldy. О́ıtkeni ol kisiniń sulý jyrlary ánge suranyp turatyn. Qysqasy, qazaq dalasynyń ár buryshynda ardaqty azamattyń óz orny bar» dedi jazýshy.
Belgili aqyn, halyqaralyq «Alash» ádebı syılyǵynyń Ǵalym Jaılybaı asyl aǵasynyń qasyna 15-16 jasynan erip, shákirti bolǵandyǵyn aıtyp, aqyn ómirden ótkende arnaǵan jyryn oqydy.
Qazaqtyń tuńǵysh ǵaryshkeri, Keńes Odaǵynyń batyry, Halyq Qaharmany Toqtar Áýbákirov aqynnyń azamattyǵy men adamgershiligine toqtaldy
− Kákimbek aǵamen Máskeýde kezdesip, tanystym. Qasyna otyrǵyzyp, áńgimege tartty. Menen «Ǵaryshqa ushýǵa daıyndalyp júrsiń be?» dep surady. Soǵan ázirlenip júrgenimdi aıttym. Ǵaryshqa ushyp kelgesin, ol kisimen taǵy kezdestim. Akademık Qanysh Sátbaev ekeýmizge arnaǵan óleńin oqyp berdi. Sonda men Kákimbek aǵanyń qarapaıymdylyǵyna tańǵaldym. Ol kisiniń aqyndyǵy da eshkimnen kem emes, biraq adamgershiligi bárinen bıik. Elimiz qandaı bolý kerek, qaı jolmen júrý kerek degende, osy kisilerdiń istegen isterin eske alý kerek. Kákimbek aǵamyzdyń ómir joly atqa minip júrgen azamattarǵa úlgi», − dedi tuńǵysh ǵaryshker.
Sonymen qatar memleket jáne qoǵam qaıratkeri Jánibek Káribjanov elimizdiń bas ordasy Almatydan Aqmolaǵa qonys aýdarǵanda, Kákimbek Salyqovtyń elordaǵa zııaly qaýymnyń alǵashqylardyń biri bolyp kóship kelip, astananyń kórkem kelbetin jyrǵa qosqandyǵyn sóz etti.
Aıtýly tulǵanyń týysqandary atynan aqyn baýyry Zaraf pen qyzy Maıra Kákimbekqyzy aqyndy ulyqtaý sharasyna qatysýshylarǵa, sonyń ishinde qoldaý kórsetken Nur-Sultan qalasy ákimdigine alǵysyn jetkizdi.