Qazaqstandy jaıaý aralap shyǵýǵa nıettengen Ulytaýdyń 72 jastaǵy turǵyny Sársenbaı Qotyrashov óz saparyn jalǵastyrýda. Búgin ol 1 700 shaqyrymdy artqa tastap, Almaty shaharyna jetti. Buǵan deıin ol 5 qalany jaıaý aralap shyqqan, dep habarlaıdy Egemen.kz.
Saıahatshy almatylyq stýdenttermen kezdesti. Ol joldaǵy eń kúrdeli aýmaq – Jezqazǵan-Qyzylorda arasy men Tarazǵa deıingi taý asýlary bolǵanyn aıtty. Alys saparǵa aýa raıy da kedergi keltiretinin jetkizdi. Degenmen, eshbir kedergige qaramastan, aqsaqal óz saparyn jalǵastyryp keledi.
Ol «Ulytaýda boldyń ba?» atty marafonǵa jeti jyl daıyndalypty. Qarııanyń maqsaty - qarasha aıynyń basyna deıin Qazaqstannyń 17 qalasyn jaıaý aralap shyǵý. Ol úshin jalpy alǵanda 8 000 shaqyrym júrý kerek.
«Jolda kezdesken adamdar jıi toqtap, meni biraz jolǵa deıin jetkizip tastaýdy usyndy. Biraq, men ózime búkil qashyqtyqty jaıaý ótip shyǵamyn dep sert bergenmin. Men osy sertimdi saqtaýym kerek», dedi Sársenbaı Qotyrashov.
Artta qalǵan 5 bes qalanyń turǵyndary saıahatshyny qýanyshpen qarsy alyp, qoldaý bildirip jatyr. Qarjylaı da, azyq-túlikpen de kómek kórsetkender bolǵan. Qarııa bundaı erekshe iltıpat oǵan saıahatyn jalǵastyrýǵa jiger beretinin aıtady.
Marafonshy Almatydan Qonaev, Taldyqorǵan, Aıagóz qalalaryna jol tartady, odan ári Aqtaýǵa jetýdi josparlap otyr.
«Men shetelde eshqashan bolǵan emespin. Osy sapardan soń, kelesi jyly Mekke men Medınaǵa jaıaý barýdy armandaımyn», deıdi ol.
Aıta ketsek, aqsaqaldyń qoldaýshy toby da bar. Onymen birge Ulytaýdan Qyzylordaǵa deıin, Shymkentten Almatyǵa deıin top jetekshisi, ólketanýshy Bahtııar Qojahmetov erip júrdi.
«Men oǵan tańǵy as jasaýǵa kómektesem. 20 shaqyrymdy kólikpen júrip ótem, bul aralyqty ol shamamen túske deıin júrip ótý kerek. Sol jerde men shaıhana, kafe, as ishetin jerdi izdeımin. Eger olar tabylmasa, oǵan túski asty ózim daıyndaımyn. Aryqaraı osy shema boıynsha taǵy 20 shaqyrym júrem de, túnep shyǵatyn oryndy izdeımin», dedi Bahtııar Qojahmetov.
Ulytaý ulttyq tarıhı-mádenı jáne tabıǵı murajaı-qoryǵynyń qyzmetkeri, eńbek ardageri Sársenbaı Qotyrashov óz saparyn 31 naýryzda bastaǵan.