Hımııadan 56-shy Halyqaralyq Mendeleev olımpıadasynda qazaqstandyq oqýshylar 3 kúmis, 5 qola medal enshiledi. Zııatkerlik saıystar 9-16 mamyr aralyǵynda Tashkentte ótti, dep habarlaıdy Egemen.kz QR BǴM baspasóz qyzmetine silteme jasap.
Qazaqstan atynan Qaraǵandy, Aqtaý, Nur-Sultan, О́skemen, Pavlodar jáne Aqtóbe oblystarynan 10 jáne 11 synyptardyń 12 oqýshysy qatysty. Olar TMD, Baltyq jáne Ońtústik-Shyǵys Eýropa elderiniń qurdastarymen bilim saıysynda baq synasty.
«Bilim jáne ǵylym mınıstrligi oqýshylarymyzǵa basqa elderdegi qurdastarymen básekelesýge múmkindigin arttyrý úshin barlyq jaǵdaıdy jasap jatyr. Kúni keshe balalarymyz alǵash ret Fransııadaǵy Dúnıejúzilik gımnazıadaǵa attanǵanyn bilesizder. О́zbekstanda ótken Mendeleev olımpıadasynyń júldegerleri qabyldaý emtıhandaryn tapsyrmaı-aq Reseıdiń jetekshi joǵary oqý oryndarynda tegin oqýǵa múmkindik alady. Qazaqstan quramasyn el ishindegi olımpıadalardyń «eleginen» ótken oqýshylar tanystyrdy. Tashkentke 2022 jylǵy respýblıkalyq olımpıadanyń jeńimpazdary men júldegerleri bardy. Sondaı-aq olar birneshe ret oqý-jattyǵý jıyndarynda eń joǵary nátıje kórsetken olımpıadalyq rezervtiń músheleri. Aıta keteıik, bıyl biz komandany úzdikterdiń úzdigi tanystyrýy úshin barlyq deńgeıdegi olımpıadany ótkizý prosesin avtomattandyrdyq», dedi «Daryn» respýblıkalyq ǵylymı-praktıkalyq ortalyǵynyń dırektory Tımýr Nurkeshev.