QR Úkimetiniń 2022 jylǵy 25 mamyrdaǵy qaýlysymen Qazaqstan Respýblıkasynyń ǵylymyn damytýdyń 2022-2026 jyldarǵa arnalǵan tujyrymdamasy bekitildi, dep habarlaıdy Egemen.kz.
Tujyrymdama qazaqstandyq ǵylymnyń jahandyq básekege qabilettiligin jáne onyń ulttyq deńgeıdegi máselelerdi sheshýge qosqan úlesin arttyrý úshin ǵylymı-zertteý, ǵylymı-tehnıkalyq nemese tájirıbelik-konstrýktorlyq jumystardy qarjylandyrý máselesine erekshe nazar aýdarady.
Máselen, jetekshi ǵylymı mektepterdi, Zertteý ýnıversıtetterin qalyptastyrý jáne damytý úshin granttyq qarjylandyrý boıynsha kózdelgen qarajat sheńberinde megagranttar bólýdi qosa alǵanda, memlekettik qoldaý sharalaryn kórsetý josparlanýda.
Álemdik trendterge sáıkes ǵylymı uıymdardyń, zertteý ýnıversıtetteri men zerthanalardyń ǵylymı ınfraqurylymy dáıekti túrde jańǵyrtylady.
Bul rette qoldanbaly zertteýlerdi qarjylandyrýda jeke qosa qarjylandyrý úlesin arttyrýǵa, ǵylymnyń óndirispen baılanysyn nyǵaıtýǵa, naqty sektordy, bıznesti ǵylymı bólimshelerdi qurýǵa jáne damytýǵa yntalandyrýǵa, basym baǵyttardy derbes aıqyndaýǵa, qajetti ǵylymı ázirlemelerge tapsyrys berýge jáne olardy engizýge basa nazar aýdarylady.
Sondaı-aq ǵalymnyń áleýmettik mártebesin arttyrý úshin jetekshi ǵalymdarǵa arnalǵan áleýmettik jeńildikter paketin ázirleý usynylady.
Jas kadrlardyń ǵylymǵa kelýin yntalandyrý úshin jyl saıyn álemniń jetekshi ǵylymı ortalyqtaryna 500 qazaqstandyq ǵalymdy taǵylymdamadan ótýge jiberý, akademııalyq jazýǵa, aǵylshyn tiline, sıfrlyq daǵdylarǵa oqytý, ǵylymı ótinim men basqa da qajetti quzyretter men daǵdylardy ázirleý, shetelde jumys isteıtin qazaqstandyqtardy ǵylymı uıymdarǵa tartý, qazirgi zamanǵy ǵylym menedjerlerin daıarlaý boıynsha keshendi sharalar iske asyrylady.
Budan basqa, ǵalymdardy ǵylymǵa qosqan úlesi úshin yntalandyrý jáne kótermeleý úshin jyl saıyn 2 myń AEK (6 mln teńgeden astam) mólsherinde 50 «Úzdik ǵylymı qyzmetker» syılyǵy beriledi.
Sondaı-aq ǵylym salasynda memlekettik ǵylymı stıpendııalar men syılyqtar berý arqyly ǵylym men tehnıkanyń damýyna úles qosqan ǵalymdardy kótermeleý jalǵasady.
Qujat ázirleýshileriniń pikirinshe, tujyrymdamany iske asyrý qazaqstandyq ǵylymnyń jahandyq básekege qabilettiligin arttyrýǵa jáne onyń eldiń áleýmettik-ekonomıkalyq jáne qoǵamdyq-saıası damýyna úlesin arttyrýǵa, ǴZTKJ-ǵa jeke sektor ınvestısııalarynyń ósýine jáne ulttyq jáne óńirlik deńgeılerdegi qoldanbaly problemalardy sheshýge yqpal etedi.
Tujyrymdamanyń tolyq mátinimen myna silteme arqyly tanysýǵa bolady.
Qaýly qol qoıylǵan kúninen bastap qoldanysqa engiziledi.