Bul týraly Senattyń jalpy otyrysynda 2021 jylǵy respýblıkalyq bıýdjettiń atqarylýy týraly esepti qaraý kezinde Premer-Mınıstrdiń orynbasary – Qarjy mınıstri Erulan Jamaýbaev málim etti, dep habarlaıdy Egemen.kz.
«2021 jyly respýblıkalyq bıýdjettiń atqarylýy koronavırýs pandemııasynyń áseri jaǵdaıynda júzege asty. Degenmen, 2020 jylmen salystyrǵanda iskerlik belsendiliktiń jandanýy baıqaldy. Ishki jalpy ónimniń ósimi 4 paıyzdy qurady. Ekonomıkanyń barlyq negizgi salalarynda oń nátıjege qol jetkizildi. Máselen, ónerkásiptik óndiris kólemi 3,8 paıyzǵa, qurylys salasy 7,6 paıyzǵa, kólik 3,6 paıyzǵa, saýda 9,2 paıyzǵa ósti. Negizgi kapıtalǵa salynǵan ınvestısııalar kólemi 3,5 paıyzǵa ulǵaıdy», dedi E.Jamaýbaev.
Sonymen qatar ol ınflıasııa deńgeıi 8,4 paıyzdy quraǵanyn eske saldy.
«Jumyssyzdyq 4,9 paıyz deńgeıinde saqtaldy. Qalyptasqan ahýalda respýblıkalyq bıýdjettiń atqarylýy kelesideı kórsetkishtermen sıpattalady. Túsimder 100,8 paıyzǵa atqarylyp, 12,7 trln teńgeni qurady. Bıýdjet tapshylyǵy ishki jalpy ónimge shaqqanda 3,1 paıyzdy qurady. Shyǵystar 99,2 paıyzǵa ıgerildi jáne 15,2 trln teńgeni qurady. Áleýmettik shyǵystar 2020 jylmen salystyrǵanda 910 mlrd teńgege ulǵaıyp, 7,5 trln teńgeni qurady. Bul – respýblıkalyq bıýdjettiń jalpy kóleminiń 50 paıyzy», dedi mınıstr.