Bıyl zııankes shegirtkemen kúresý maqsatynda respýblıkalyq jáne jergilikti bıýdjetterden 2,5 mlrd teńge bólinedi. Bul týraly Aýyl sharýashylyǵy mınıstrligi Agroónerkásiptik keshendegi memlekettik ınspeksııa komıtetiniń tóraǵasy Almabek Mars ortalyq kommýnıkasııalar qyzmetinde ótken brıfıngide aıtty, dep habarlaıdy Egemen.kz.
«Respýblıka aýmaǵynda erekshe qaýipti organızmniń 12 túri, zııandy organızmniń 5 túri, karantındik obektilerdiń 14 túri taralǵan. Búginde shegirtkelermen kúresýge erekshe kóńil bólinedi. Bıyl úıirli shegirtke 997 myń gektar aımaqqa taralǵan. Onyń ishinde ıtalııalyq prýs – 760 myń, azııalyq shegirtke 201 myń jáne marokko shegirtkesi - 35 myń gektarǵa taralǵan. Sonymen qatar saıaq shegirtke zııankesteri 271 myń gektar alańda baıqalǵan. Jalpy shegirtkelerge qarsy respýblıka bıýdjetinen 1,9 mlrd teńge, jergilikti bıýdjetten 659 mln teńge bólindi», dedi ol.
Onyń aıtýynsha, atalǵan qarajat pestısıdter men hımııalyq óńdeý qyzmetterin qajetti mólsherde satyp alýǵa múmkindik bergen.
«Úıirli shegirtkelerge qarsy óńdeý jumystaryn tıimdi júrgizý úshin ártúrli toptaǵy pestısıdter satyp alyndy. Oblys ákimdikterimen birlesip, aımaq ákimderiniń orynbasaralary basqaratyn jedel shtabtar quryldy», dedi ınspeksııa basshysy.