Jambyl oblysynda nóserli jaýyn saldarynan joldardy sý basyp, sel júrdi, qoradaǵy mal ólip, kólik mingen adamdar sý ortasynda qaldy, dep habarlaıdy Egemen.kz.
Tótenshe jaǵdaılar mınıstrliginiń baspasóz qyzmetinen málim etkendeı, 23 maýsym kúni saǵat 20.00-de Qordaı aýdany, Úlken Sulýtór aýylynda nóser jańbyr saldarynan Yrǵaıty ózeniniń boıymen sel tasqyny ótti.
Saldarynan aýyl joldaryn sý basty. Sondaı-aq jeke turǵyn úılerdiń 2 sharýashylyq qurylysy qırady.
«Qaza bolǵandar men zardap shekkender joq. Aldyn ala málimet boıynsha, mal shyǵyny bar. Jergilikti atqarýshy organnyń komıssııasy kelgen zalal mólsherin anyqtap jatyr», dedi vedomstvodan.
Oqıǵa ornyna Tótenshe jaǵdaılar departamentinen 8 qyzmetker, 2 tehnıka, jergilikti atqarý organdarynan 5 qyzmetker jáne 2 tehnıka barǵan.
Budan bólek, osy kúni saǵat 23:25-te Qordaı aýdany, Sharbaqty aýylynan 4 shaqyrym jerde Yrǵaıty ózeniniń deńgeıi kúrt kóterilip, arnasynan asqan.
«О́zen jaǵasynda 11 adam demalyp jatqan. Sýdyń kóterilý saldarynan aınalasyn sý basqan dóńes jerde 6 adam kólik ishinde qalyp qoıdy. Sondaı-aq ekpindi aǵys demalýshylardyń ekinshi kóligin shaıyp ketti.
24 maýsymda saǵat 01:15-te TJD qutqarýshylary aralda qalǵan barlyq adamdy qutqardy. Olarǵa medısınalyq kómek qajet bolmady. Qaza bolǵandar men zardap shekkender joq», dedi QR TJM baspasóz qyzmetinen.