Áleýmettik-kásipkerlik korporasııalar azyq-túlik baǵasyn turaqtandyrýǵa bólingen 39 mlrd teńgeni tıimsiz ıgergen. Bul týraly Sybaılas jemqorlyqqa qarsy is-qımyl agenttiginiń tóraǵasy Oljas Bektenov vedomstvonyń alqa otyrysynda málim etti, dep habarlaıdy Egemen.kz.
«Áleýmettik-kásipkerlik korporasııalardyń qyzmetinde eleýli sybaılas jemqorlyq táýekelderi anyqtaldy. Bul – jer ýchaskelerin ınvestısııalyq joba jeleýimen satý, affılırlengen tulǵalarǵa aktıvterdi arzandatyp satý úshin konkýrstan tys berý sııaqty áreketter. Azyq-túlik baǵasyn turaqtandyrýǵa bólingen 39 mlrd teńge naqty nátıjesiz ıgerilgen. Korporasııalar tarapynan úlestes kompanııalarǵa nesıe berilip, mindettemelerdiń oryndalýyna baqylaý júrgizilmegen. Atalǵan faktiler boıynsha ÁKK laýazymdy tulǵalaryna qatysty 11 qylmystyq is tirkeldi. Shyǵyn 7 mlrd teńgeden asty», dedi Oljas Bektenov.
Onyń aıtýynsha, agenttik áleýmettik kásipkerlik korporasııalardyń qyzmetin qaıta qaraýdy kózdeıtin usynymdar engizgen.