Bul týraly Memleket basshysy Úkimettiń keńeıtilgen otyrysynda aıtty, dep habarlaıdy Egemen.kz.
«Medısına salasyna bólingen qarjy kólemi artqanymen, munda qordalanǵan máseleler sheshimin tappaı otyr. Mindetti áleýmettik medısınalyq saqtandyrý júıesi tıimdi bolmady, naqty nátıje joq. Úsh mıllıonǵa jýyq adam medısınalyq saqtandyrýdan tys qalǵan. Sonyń kesirinen olar densaýlyq saqtaý salasyndaǵy qyzmetterdi tolyq paıdalana almaıdy.
Úkimet Strategııalyq josparlaý jáne reformalar agenttigimen birlesip, medısınalyq saqtandyrý júıesin jetildirý jóninde usynystar daıyndaýy kerek.
Kelesi ózekti másele – densaýlyq saqtaý júıesin sıfrlandyrý. Bul jumys óte baıaý júrip jatyr. Jalpy, sıfrlandyrýdyń qazirgi deńgeıi dárigerlerdiń jumysyn jeńildetip otyrǵan joq.
Densaýlyq saqtaý salasynda 40-tan astam aqparattyq júıe jumys isteıdi. Ár júıeniń óz kemshilikteri bar. Mınıstrlik bolsa, jaýapkershilikten qashyp, naqty sheshim qabyldamaı otyr. Al, munyń zardabyn dárigerler men azamattar tartýda. Úkimet osy máseleni tez arada sheshýi kerek», dedi Prezıdent Úkimettiń keńeıtilgen otyrysynda.