Pavlodar oblysyna jumys sapary aıasynda Premer-Mınıstrdiń orynbasary Eraly Toǵjanov Pavlodar munaı-hımııa zaýytynda bolyp, kásiporynnyń qyzmetimen, josparly jóndeýden keıin zaýytty iske qosýǵa daıyndyq barysymen, sondaı-aq kásiporyn men servıstik kompanııalar qyzmetkerleriniń eńbek jaǵdaılarymen tanysty, dep habarlaıdy Egemen.kz primeminister.kz saıtyna silteme jasap.
Ýaqytsha jóndeý kezeńinde Qazaqstan boıynsha qajetti is-sharalar oryndaldy. Zaýytta jumystyń óndiristik sıklin úzdiksiz qamtamasyz etý úshin jabdyqtyń ónerkásiptik qaýipsizdigine tehnıkalyq kýálandyrý jáne saraptama júrgizildi.
Sonymen qatar tehnologııalyq qondyrǵylarda josparly-aldyn alý jóndeý jumystaryna sáıkes, jabdyqtardy tekserý, tazalaý jáne aýystyrý is-sharalary júrgizildi. Vıse-premer bir apta ishinde ónim shyǵarý kólemi 1,5 myńnan 9 myń tonnaǵa deıin ulǵaıtylatynyn atap ótti.
Negizgi mindet – qalypty jumys rejımine oralyp, kúzgi egis jumystaryna aldyn ala daıyndalý jáne energııa resýrstary baǵasynyń kóterilýine jol bermeý arqyly elimizdiń ortalyq jáne soltústik óńirlerin qamtamasyz etý.
Eraly Toǵjanov zaýyttaǵy jóndeý jumystary kezinde jaǵarmaı baǵasy burynǵy deńgeıde qalǵanyn aıtty. Jazǵy kezeńde týrısterdiń kelýine baılanysty jaǵarmaı jetkizýde qıyndyqtar týyndaǵanymen Úkimet jáne tıisti organdar bul máselelerdi jedel túrde sheship otyrdy.
«Energetıka mınıstriniń II jartyjyldyqqa arnalǵan janar-jaǵarmaı materıaldarynyń baǵasy boıynsha Buıryǵy bekitildi. AI-92 benzıniniń baǵasy burynǵy deńgeıde qaldy (lıtrine 182 teńge), Soltústik Qazaqstan jáne Qostanaı oblystaryn esepke almaǵanda, munda logıstıkanyń qymbattaýyna baılanysty benzınniń bir lıtriniń baǵasy 187 teńge turady. AI-95 markaly benzınniń baǵasy rettelmeıdi (buryn 215 teńge bolsa, qazir de ortasha baǵa sondaı bolyp qaldy). Dızel otynynyń baǵasy óńirlerdiń erekshelikterine qaraı burynǵy deńgeıde saqtalyp qaldy, lıtrine 230-260 teńge. 28 shildeden bastap PMHZ jóndeýden keıin óz jumysyn bastaıdy», dedi Toǵjanov.
Halyqtyń tabysyn arttyrý baǵdarlamasy sheńberinde eńbek kiristerindegi teńgerimsizdikti joıý jáne jumyskerlerdiń jalaqysyn salalyq ortasha kórsetkishten tómen emes deńgeıde arttyrý, halyqty ónimdi jumyspen qamtýdy ulǵaıtý maqsatynda memlekettik qoldaý sharalaryn alý kezinde bıznestiń mindettemeleri belgilendi.
2022 jylǵy 30 mamyrdaǵy jaǵdaı boıynsha «PMHZ» JShS 2 315 adam jumys isteıtin 13 servıstik (aýtsorsıngtik) kompanııamen 29 shart jasasty. Osy máseleni retteý maqsatynda «PMHZ» JShS buryn aýtsorsıngke shyǵarylǵan personaldyń jalaqysyn jáne áleýmettik paketin odan ári arttyra otyryp, servıstik kompanııalardyń qyzmetteriniń qunyn arttyrý boıynsha usynystardy, sondaı-aq, aýtsorsıng qyzmetkerleriniń jalaqysyn kóterý boıynsha shart somasyn ulǵaıtý úshin qoldanystaǵy sharttarǵa qosymsha kelisimder ázirlenip, «QazMunaıGaz» UK AQ-men kelisildi.
Sonymen qatar jalaqyny arttyrý «PMHZ» JShS qarjylyq múmkindikterine qaraı júrgizilip, jumyskerlerdiń biliktiligine, oryndaıtyn jumystyń kúrdeliligi, sany jáne sapasyna, eńbek sharttaryna qaraı, sondaı-aq ulǵaıtýsyz qoldanystaǵy munaı óńdeý tarıfi sheńberinde dıfferensııalanady.
Aýtsorsıngtik kompanııalar personalynyń laýazymdyq jáne tarıftik mólsherlemeleri ár kompanııa úshin jekeleı jumyskerlerdiń biliktiligi, oryndaıtyn jumystyń kúrdeliligi, sany jáne sapasyna, eńbek sharttaryna baılanysty 14-ten 56%-ǵa deıin ulǵaıtylady.
Kezdesý sońynda Eraly Toǵjanov kásiporyn basshylyǵyna kadrlar daıarlaýǵa erekshe nazar aýdarýdy tapsyrdy. Ol zaýyt basshylyǵyna óńirdegi kolledjderdiń birin óz qamqorlyǵyna alýdy usyndy. Pavlodar munaı-hımııa zaýyty munaıdy otyn nusqasy boıynsha óńdeıdi jáne óńdeý tereńdigin 88%-ǵa deıin qamtamasyz etedi, bul úzdik óndirýshilerdiń deńgeıine sáıkes keledi.
Zaýyt avtomobıl benzınin, RJ markaly reaktıvti qozǵaltqyshtarǵa arnalǵan otyn, dızel otynyn, mazýt, munaı koksyn, jol bıtýmyn, kommýnaldyq-turmystyq maqsattaǵy gazdar shyǵarady.