Shildede Ulttyq bank valıýtalyq ıntervensııalardy, sondaı-aq BJZQ men senimgerlik basqarýdaǵy basqa da qorlardyń zeınetaqy aktıvteri úshin shetel valıýtasyn satyp alý nemese satý operasııalaryn júrgizgen joq, dep habarlaıdy Egemen.kz Ulttyq banktiń baspasóz qyzmetine silteme jasap.
«Shildeniń qorytyndysy boıynsha, teńge baǵamy 1 dollar úshin 477,07 teńgege deıin kóterilip, 1,5%-ǵa ózgerdi. Qazaqstan qor bırjasyndaǵy saýda-sattyqtyń ortasha kúndik kólemi bir aıda 96,4 mln AQSh dollarynan 118,6 mln AQSh dollaryna deıin ulǵaıdy. Shildede saýda-sattyqtyń jalpy kólemi 2,4 mlrd AQSh dollaryn qurady.
Valıýta naryǵyna kvazımemlekettik sektor sýbektileriniń valıýtalyq túsimdi satýy qoldaý kórsetti. Olar shamamen 543,9 mln AQSh dollaryn qurady. Kvazımemlekettik sektor kompanııalary ekinshi deńgeıli bankter arqyly valıýta naryǵynda saýdany derbes júzege asyrady.
Shildede Ulttyq qordan respýblıkalyq bıýdjetke transfertterdi qamtamasyz etý úshin shetel valıýtasyn satý 599,2 mln AQSh dollaryn qurady. Ulttyq qordan satý úlesi saýda-sattyqtyń jalpy kóleminiń 25,3% quraıdy», delingen habarlamada.