Zeınetaqy qoryndaǵy shekti somadan asatyn qarajatty paıdalaný aksııasy áli jalǵasyp jatyr. Iá, byltyrǵydaı belsendi emes. Sebebi bıyl sáýir aıynan beri shekti soma mólsheri eki ese ósip ketti. Sóıtip, kóp adam qordaǵy aqshany alý múmkindiginen aıyryldy.
Sonyń ózinde 2022 jyldyń 1 tamyzyndaǵy jaǵdaı boıynsha BJZQ zeınetaqy jınaqtaryn turǵyn úıge jáne emdelýge paıdalanýǵa baılanysty 1,7 mln-nan astam ótinishti oryndalǵan.
«2021 jyldyń qańtarynan beri BJZQ salymshylardyń (alýshylardyń) turǵyn úı jaǵdaıyn jaqsartý úshin jınaqtalǵan zeınetaqy qarajatyn paıdalaný týraly 1 328 015 ótinishin oryndady. Ýákiletti operator-bankterde ashylǵan qazaqstandyqtardyń arnaıy shottaryna BJZQ 3,1 trln teńgeden astam qarjy aýdardy. Birjolǵy zeınetaqy tólemderiniń ortasha somasy – 2,4 mln teńge. Oryndalǵan ótinishterdiń eń kóbi Almaty qalasynyń (17,60%), Nur-Sultan qalasynyń (14,03%), Mańǵystaý oblysynyń (10,35%) turǵyndary tarapynan joldanǵan», delingen BJZQ habarlamasynda.
Qazirgi ýaqytta «Otbasy banki» turǵyn úı qurylys jınaq banki» AQ, «Qazaqstan Halyq banki» AQ, «Altyn Bank» AQ, «Bank SentrKredıt» AQ jáne «Bank Frıdom Fınans Kazahstan» AQ zeınetaqy jınaqtarynyń bir bóligin paıdalanýǵa ótinishterdi qabyldaıtyn ýákiletti operatorlar bolyp sanalady.
Birjolǵy zeınetaqy tólemi ýákiletti operatorda («Otbasy bank») ashylǵan arnaıy shotqa túskennen keıin alýshy ýákiletti operatorǵa birjolǵy zeınetaqy tólemderiniń nysanaly maqsatyn rastaıtyn qujattardy olar kelip túsken kúnnen bastap 20 jumys kúni ishinde usynady. Buǵan turǵyn úı satyp alý nemese jeke turǵyn úı salý maqsatynda odan ári jınaqtaý úshin turǵyn úı qurylysyna salymdy tolyqtyrý jatpaıdy. Bul jaǵdaıda alýshy «Otbasy bankine» birjolǵy zeınetaqy tólemderiniń nysanaly maqsatyn rastaıtyn qujattardy olar kelip túsken kúnnen bastap 3 jyl ishinde beredi.
Basqa ýákiletti operatorlar (ekinshi deńgeıdegi bankter) boıynsha birjolǵy zeınetaqy tólemine arnalǵan ótinishter jáne alýshynyń maqsattary boıynsha qujattar banktiń ishki qujattarynda belgilengen tártippen merzimge saı qaralady. Bul rette, bank birjolǵy zeınetaqy tólemderiniń somalaryn ótinish berýshiniń (alýshynyń) arnaıy shottaryna eseptelgen kúnnen bastap 10 jumys kúni ishinde olardyń nysanaly maqsaty boıynsha birjolǵy zeınetaqy tólemderin aýdarady. Ýákiletti operatorǵa rastaýshy qujattar belgilengen merzimde berilmegen jaǵdaıda, bul qarajat BJZQ-ǵa qaıtarylady.
Qazirge deıin ýákiletti operatorlardan salymshylardyń (alýshylardyń) jeke zeınetaqy shottaryna (JZSh) shamamen 450,6 mlrd teńge qarajat qaıtarylǵan.
Sonymen qatar BJZQ emdelýge berilgen 302,5 mlrd teńgege 388 824 ótinishti oryndapty. Bul rette alýǵa bolatyn ortasha soma shamamen 0,8 mln teńge. Sonymen qatar salymshylardyń (alýshylardyń) BJZQ-daǵy JZSh-na ýákiletti operatordan («Otbasy banki» turǵyn úı qurylys jınaq banki» AQ) 31,3 mlrd teńge qaıtaryldy. Bul qarajat ótinish berýshiniń qalaýy nemese ózge de sebepter boıynsha belgilengen merzimde paıdalanylmaǵan.
Al ınvestısııalyq portfeldi basqarýshylarǵa (IPB) 8,7 mlrd teńge aýdarylyp, BJZQ 5 877 ótinishti oryndady. Aýdarymnyń ortasha somasy – 1,5 mln teńge. BJZQ-nyń zeınetaqy aktıvterin senimgerlikpen basqarýǵa qatysty tórt IPB-men shart jasasqany belgili. Zeınetaqymen qamsyzdandyrý týraly zańǵa sáıkes, IPB ınvestısııalyq basqarýdy júzege asyrǵany úshin komıssııalyq syıaqy alýǵa quqyly. IPB syıaqysynyń shekti shamasy alynǵan ınvestısııalyq tabystyń 7,5%-ynan aspaýy tıis. Komıssııalyq syıaqynyń naqty shamasyn jyl saıyn IPB-nyń basqarýshy organy bekitedi jáne ol jylyna bir ret qana ózgerýi múmkin.