Stýdentterge baǵa qoıý kezinde onyń akademııalyq bilimimen birge áleýmettik jáne zertteý belsendiligin eskeretin pılottyq joba qolǵa alynady. Bul týraly Úkimet otyrysynda Ǵylym jáne joǵary bilim mınıstri Saıasat Nurbek málimdedi, dep habarlaıdy Egemen.kz.
«Eńbek naryǵyn joǵary bilim deńgeıinde tájirıbeli mamandarmen qamtamasyz etý jáne olardy mobıldi daıarlaý úshin qoldanbaly bakalavrıat modeli engizildi. Osy jyldyń qyrkúıek aıynan bastap pılottyq rejımde 8 joǵary oqý ornynyń bazasynda jańa baǵdarlamalar iske qosylady.
Sondaı-aq, 4 joǵary oqý ornynyń bazasynda pılottyq rejımde stýdentterdiń áleýmettik jáne zertteý belsendiligin eskeretin bilim alýshylardy baǵalaýdyń jańa modeli, ıaǵnı ıntegraldyq GPA pılottyq jobasyn bastap jatyrmyz. Endi stýdentterdi baǵalaý kezinde tek akademııalyq kórsetkishter emes, zertteýlerge, volonterlik, debattyq qozǵalystarǵa qatysýy da eskeriledi», dedi mınıstr.
Onyń aıtýynsha, tamyzdyń sońynda joǵary bilim berý salasynyń ókilderi derbes Tamyz konferensııasyn ótkizbek.
«Tórtinshiden, joǵary oqý oryndary akademııalyq proseske daıyndyqty qamtamasyz etý jónindegi jumysty aıaqtady. Rektorlarmen úsh úlken kezdesý ótkizdik. Bilim berý baǵdarlamalaryn oqý-ádistemelik qamtamasyz etý, kesteni bekitý, pedagogıkalyq júktemeni anyqtaý, oqytýshy-professorlyq quramnyń biliktiligin arttyrýdy qamtamasyz etý jumystary atqaryldy.
24-25 tamyzda Tamyz konferensııasyn ótkizemiz. Forým aıasynda forsaıt-sessııalar men birqatar semınar uıymdastyrylady», dedi vedomstvo basshysy.