Almaty qalalyq bilim basqarmasy basshysynyń orynbasary Aıdyn Saılaýbaı mektep oqýshylaryna oqýlyq satyp alý úshin 3 mıllıard teńgeden asa qarjy bólingenin aıtty, dep habarlaıdy Egemen.kz.
Spıkerdiń aıtýynsha, 25 tamyzǵa deıin megapolıs mektepterine oqýlyqtar tolyq jetkizilýi tıis.
«Jergilikti bıýdjetten oqýlyqtar men kórkem ádebıetti satyp alýǵa 3 mlrd 263 mln 457 myń teńge bólindi. Bıyl 2 synyp oqýshylary jańa oqýlyqtar alady. 1-11 synyp oqýshylary 25 tamyzǵa deıin 100% tegin oqýlyqtarmen qamtamasyz etiledi», dedi Aıdyn Saılaýbaı.
Sonymen qatar, ol ıntellektisi buzylǵan balalar oqıtyn mektepterge arnalǵan oqýlyqtar satyp alynatynyn atap ótti.
«Jańa oqý jylynda 300 mln teńge somasyna kórkem ádebıet kitaptary jáne 37,11 mln teńgege ıntellektisi buzylǵan arnaıy mektepterge arnalǵan oqýlyqtar, soqyr balalarǵa arnalǵan relefti-núkteli Braıl qarpindegi oqýlyqtar jáne nashar kóretin balalarǵa arnalǵan irilendirilgen qaripteri bar oqýlyqtar satyp alynady», dep tolyqtyrdy spıker.