Ulttyq bank ekonomıkanyń naqty sektoryndaǵy kásiporyndarda júrgizilgen saýaldama nátıjesin jarııalady. Saýaldamanyń qorytyndysy kólik pen qoıma salalarynda, sondaı-aq aýyl sharýashylyǵynda daıyn ónimge degen suranysqa qatysty jaǵdaıdyń jaqsarǵanyn kórsetti. Taý-ken óndirý jáne óńdeý ónerkásibinde jaǵdaı nasharlaǵan. Saýda men qurylystaǵy suranys kórsetkishi de teris aımaqta tur.
Aqsha-kredıt saıasaty departamenti dırektorynyń orynbasary Denıs Chernıavskııdiń aıtýynsha, bıyl ekinshi toqsanda aýyl sharýashylyǵynda, óńdeý ónerkásibinde jáne saýdada suranysqa baılanysty jaǵdaı jaqsarady degen úmit bar. Al taý-ken óndirý ónerkásibi men kólikte jáne qoımada saqtaý salasynda suranys ósimi birshama báseńdemek.
«Ekinshi toqsanda shıkizat pen materıaldar baǵasynyń ósý qarqyny jedeldegeni barlyq salada sezildi. О́ndiristik qýatty júkteýdiń jalpy deńgeıi kóterildi. Anaǵurlym joǵary kórsetkish qurylysta baıqaldy. Básekelestiktegi mańyzdylyqtyń joǵary deńgeıi burynǵysynsha saqtalyp qaldy. Naryqtyq básekeniń yqpalyna jıi túsetinder – saýda kásiporyndary. Dollar men rýbl – sheteldik áriptestermen esep aıyrysýda paıdalanylatyn negizgi valıýta. Dollar ken óndirý ónerkásibinde esep aıyrysýda basym (kásiporyndardyń 62,1 paıyzy) bolsa, óńdeý ónerkásibinde kásiporyndardyń 64,9 paıyzy, saýdada 58,4 paıyzy rýbldi paıdalanady», dedi D.Chernıavskıı.
Kóptegen kásiporynnyń pikiri boıynsha, ekinshi toqsanda bıznesti júrgizýge negizgi kedergi bolǵan faktor – Qazaqstan ekonomıkasynyń jaǵdaıy. Saýda kásiporyndary úshin eń mańyzdy shekteýshi faktorlardyń biri – basqa kásiporyndar tarapynan týyndaıtyn naryqtyq básekelestik.
«О́ńdeý ónerkásibiniń 26,4 paıyzy jáne aýyl sharýashylyǵy kásiporyndarynyń 31,3 paıyzy bilikti kadrlardyń jetkiliksizdigin atap ótti. Aldaǵy 12 aıda barlyq sektor boıynsha qarjylandyrý deńgeıi jalpy ózgerissiz qalady, sonymen birge ken óndirý ónerkásibi jáne aýyl sharýashylyǵy jáne óńdeý ónerkásibi men kólik salasy kásiporyndarynda qarjylandyrýdyń eń úlken ósimi, saýda salasynda jáne qurylysta eń tómen ósimi kútilýde. Investısııa kólemin tómendetýdi josparlap otyrǵan kásiporyndardyń eń joǵary úlesi qurylysta jáne óńdeý óndirisinde, al eń tómen úlesi saýda salasynda kútilýde. Qarastyrylyp otyrǵan salanyń bárinde ınvestısııany arttyrýdy josparlap otyrǵan kásiporyndar úlesinen, ony tómendetýdi josparlap otyrǵandardyń úlesi artyq», delingen Ulttyq bank baıandamasynda.
Sonymen qatar saýda, qurylys jáne óńdeý salasynan basqa barlyq sala bank nesıesine qol jetkizý turǵysynan qıyndyqqa ushyraǵan. Kredıtteý sharttaryn qolaısyz dep esepteıtin kásiporyndardyń eń kóp úlesi – aýyl sharýashylyǵy salasynda (18,5 paıyz). Kólik jáne qoımalaý salasynda olardyń úlesi eń tómengi deńgeıde (10,9 paıyz). 2022 jyldyń úshinshi toqsanynda nesıe alýǵa nıetti kásiporyndardyń eń kóp úlesi óńdeý ónerkásibi men saýda salasynda (20,5 paıyz jáne 16,6 paıyz, sáıkesinshe), eń tómen úlesi – taý-ken ónerkásibi men kólik jáne qoımalaý salasynda (7,8 paıyz jáne 8,2 paıyz) bolady dep kútiledi.