«Egemen Qazaqstan» gazetiniń osy jylǵy 23 tamyz kúngi sanynda «Qaptaǵan kenishterden qaıyrym bar ma?» atty maqala jaryq kórgen edi. Onda Baıanaýyldaǵy halyqtyń kómir qymbatshylyǵyna alańdap otyrǵany, memlekettik mekemelerdiń jergilikti kenishterge qatysty áreketsizdik tanytqany jaıly másele kóterildi. Oblystyń energetıka jáne turǵyn úı-kommýnaldyq sharýashylyq basqarmasynan tolǵandyrǵan taqyrypqa oraı jaýap hat keldi.
Maqala gazette jaryq kórgen soń basqarma ókilderi birden habarlasyp, atalǵan másele boıynsha sharalardy qolǵa alyp jatqandaryn málim etti. Hattyń mátinin tolyq jarııalaýdy qup kórdik.
«Qazirgi ýaqytta «Maıkýben-Vest» AQ-dan ózdiginen alyp ketý arqyly satyp alynatyn kómir baǵasy QQS-men qosa eseptegende 7 500 teńgeni, «Gamma Sarykol» JShS-nan (QQS-men) 5 500 teńgeni quraıdy. Bul baǵalar úsh jyl boıy ózgergen joq jáne aldaǵy jylytý maýsymynyń sońyna deıin áreket etetin bolady. Sonymen qatar oblystyń energetıka jáne TKSh basqarmasy «Maıkýben-Vest» AQ jáne «Gamma Sarykol» JShS basshylyǵyna Baıanaýyl aýdanynyń turǵyndary úshin kómir baǵasyn tómendetý múmkindigin qaraý týraly hattar joldady. Qazirgi ýaqytta bul hattar qarastyrylýda» delingen hatta.
Baıanaýyldyq jurtty jyldar boıy alańdatqan máselege jergilikti bıliktiń nazary aýyp, kómir kenishterin ıelenip alǵan ınvestorlarǵa halyq talabyn jetkizip jatqany qýantarlyq jaǵdaı dep baǵalaımyz. Kóptiń kókeıinde júrgen tilekke kenishterdiń quryltaıshylary da ún qatady dep úmittenemiz. Turǵyndar bul máselege óńir basshysy Ábilqaıyr Sqaqov aralasyp, óńirde tıisti sharalar qolǵa alynady, el kóńilinen shyǵatyn sheshim qabyldanady dep senedi.
Pavlodar oblysy