Volfram kenin baıytýdyń jańa tehnologııasy Joǵarǵy Qaıraqty ken ornyndaǵy taý-ken metallýrgııa keshenin paıdalanýdyń barlyq merziminde onyń tıimdi jumys isteýin qamtamasyz etedi. Atalǵan ken ornynda óndirýdiń bastalýy Qazaqstandy álemdik volfram naryǵynyń negizgi qatysýshylarynyń birine aınaldyrady. Volfram óziniń aıryqsha ekstremaldy qattylyǵymen, joǵary tyǵyzdyǵymen jáne otqa tózimdiligimen álemdegi eń kóp izdelinetin metaldardyń biri bolyp sanalady.
Zertteýler men jartylaı ónerkásiptik synaqtar «Soltústik Qatpar» JShS-nyń tapsyrysy boıynsha volfram kenderin qaıta óńdeýge mamandanǵan QHR-dyń jetekshi zertteý ortalyqtarynyń bazasynda ótkizildi. Alynǵan málimetter negizinde baıytý fabrıkasy men gıdrometallýrgııalyq zaýytty jobalaý úshin tehnologııalyq reglamentter ázirlendi.
«Flotokonsentrat úlgisinde kúshálanyń bolmaýy jáne jalpy quramynda bógde qospalardyń az bolýy erekshe mańyzdy. Flotokonsentrattan alynǵan ammonıı paravolframatynyń úlgisi barlyq normatıvtik talaptarǵa sáıkes keledi. Sońǵy ónimge volframdy alýdyń joǵary deńgeıine qol jetkizildi», dedi «Soltústik Qatpar» JShS bas tehnology Ǵanı Qulmuhamedov.
Joǵarǵy Qaıraqty ken orny Qazaqstan úshin strategııalyq turǵyda mańyzdy. Munda Measured+Indicated+Inferred sanatyndaǵy JORC standarttary boıynsha resýrstar kólemi 712 myń tonna volfram úshtotyǵyn quraıdy. Alaıda mıneraldy quramnyń erekshelikterine baılanysty buryn jasalǵan tehnologııalar ekstraksııanyń joǵary deńgeıine senýge múmkindik bermedi.
Aıta ketelik, Joǵarǵy Qaıraqty volfram ken orny Qaraǵandy oblysynyń Shet aýdanynda, Qaraǵandydan ońtústikke qaraı 130 shaqyrym jerde ornalasqan. Ken ornyn ıgerý jobasynyń operatory «Soltústik Qatpar» JShS – «Taý-Ken Samuryq» UTK» AQ-nyń 100% enshiles kásiporny. Jobanyń TEN-in ázirleý boıynsha jumystar júrgizilýde.