Úzdikter tiziminen óz órenderimizdi kórgimiz keledi

Kósh basyna jartylaı jeńil salmaqtyń chempıony Aleksandr Volkanovskı kóterildi. Kelesi aıdyń aıaǵynda 34 jasqa tolǵaly otyrǵan aýstralııalyqtyń osy sport túrin serik etkenine 10 jyldan asty. Onyń aldynda Vol­kanovskı grek-rım kúresi jáne regbımen shuǵyldanǵan. 2013 jyldyń mamyr aıynda ol Mel­býrnde óziniń otandasy Korı Nel­sonnan utylyp qalǵan bolatyn. Sodan keıin birde-bir ret je­ńi­listiń kermek dámin tatqan emes.

Aleksandr barlyǵy 25 kezdesýde jeńiske jetip, 15 qar­sylasyn aıqyn basymdyqpen utty. 2016 jyldan beri UFC-de kúsh synasyp júr. Arada úsh jyl ótken soń Las-Vegasta jergilikti faıter Maks Hel­loýeıdi upaı sanymen utyp, chempıondyq belbeýdi ıe­lendi. Sodan keıin taǵy bes ret óz ata­ǵyn sátti qorǵady. Ja­syl qur­lyqtyń ókili ár jyldary Sheın Iаng, Mıdzýto Hıroto, Dar­­ren Elkıns, Ched Mendes, Jo­ze Aldý, Braıan Ortega, Chon Chhan Son syndy sańlaqtardy san soq­tyr­dy. Al ataqty Helloýeıdiń ózi­nen Volkanovskı úsh márte basym tústi.

Ataǵy jer jarǵan Israel Ade­sanıa men Charlz Olıveıra úzdik úshtiktiń sanatynda. 33 jas­taǵy Israel 1989 jyly Nı­gerııada dúnıege kelip, keıinnen Jańa Zelan­dııa­ǵa qonys aýdardy. Ol da dál Alek­sandr Volkanovskı sekildi ózi­niń sporttyq karera­synda bir ret qana jeńildi. Byltyr kóktemde Adesanıa jar­tylaı aýyr salmaqqa aýy­samyn dep, pol­shalyq Iаn Blahovıchke upaı sanymen ese jiberdi. О́zge 23 jekpe-jegin tegisteı utyp, 15 qarsylasyn no­­kaýtqa jiberdi. Qazirgi kezde ol – orta salmaqtyń chempıo­ny. Araldyq faıterden taıaq jegender arasynda Anderson Sılva, Kelvın Gastelým, Robert Ýıttaker, Ioel Romero, Paýlý Kos­ta, Mar­­vın Vettorı jáne Djared Kan­none syndy álemge áı­gili sportshylar bar.

Jartylaı orta salmaqta kúsh synasyp júrgen 32 jastaǵy Charlz Olıveıranyń aralas jekpe-jekke myqtap den qoıǵanyna 15 jylǵa jýyqtady. Barlyǵy 42 ret ok­tagonǵa shyqqan ol 33 már­te jeńis toıyn toılap, 30 qarsylasyn esinen tandyrdy. Ol djıý-djıtsýdyń has sheberi. Qarsylastarynyń denin Charlz qylqyndyryp tastaǵanyn san márte kózimiz kórdi. Bul jigitten oısyraı utylǵandar arasynda Donald Serrone, Nık Lens, Entonı Pettıs, Djım Mıller, Ke­vın Lı, Tonı Fergıýson, Maıkl Chendler, Dastın Pore, Djastın Getjı jáne taǵy bas­qalar bar.

Al úzdikter tizimindegi odan keıingi oryndardy Kamarý Ýs­man (AQSh), Frensıs Nganný (Fran­sııa), Leon Edvars (Uly­brıtanııa), Aldjameın Sterlıng (AQSh), Dastın Pore (AQSh), Deıveson Fıgeredo (Brazılııa) jáne Irjı Prohazka (Chehııa) ıelendi.