Fılosofııa, saıasattaný jáne dintaný ınstıtýty Saıası zertteýler ortalyǵy men Almaty qalasy ákimdiginiń Qoǵamdyq damý basqarmasy birlesip ótkizgen «Jańa Qazaqstannyń qalyptasýy maqsatyndaǵy konstıtýsııalyq jańǵyrtý» taqyrybyndaǵy konferensııada ǵylymı qoǵamdastyq Ata Zańymyzdyń mártebesine qatysty, Jańa Qazaqstandy qurýǵa baılanysty oı-pikirlerimen bólisti.
Konferensııa qatysýshylarynyń aldynda sóz sóılegen Fılosofııa, saıasattaný jáne dintaný ınstıtýtynyń bas dırektory, akademık Serik Seıdýmanov elimizdiń otyz jyl merzimdegi damý jetistikterine toqtaldy. S.Seıdýmanov atap ótkendeı, belgili jaǵdaılarǵa baılanysty Qazaqstanda obektıvti baǵalaýdy jáne ony iske asyrý tehnologııalaryn ázirleýdi qajet etetin birqatar «jasyryn prosester» saqtalyp otyr. «Bul baǵytta adam quqyqtary, áleýmettik teńsizdik, olıgopolııa, halyqtyń ómir súrý sapasynyń toqyraýy sııaqty problemalardy sheshý – el Úkimeti úshin birinshi kezektegi mindetter. Memlekettik menedjment búkil qoǵam úshin transparentti jáne ońtaıly sheshimderge fýnksıonaldyq kóshýdi jandandyrý, memleketti qoǵamdyq baqylaýdyń jańa ınstıtýttaryn demokratııalandyrý men beıimdeý, «Halyq únine qulaq asatyn memleket» quraldaryn is júzine asyrý, ony bıýrokratııasyzdandyrý men sheshimderdiń formalızmin eńserý jolymen jańǵyrtylýǵa tıis. Osy mindetter sheńberinde respýblıkanyń qoldanystaǵy Konstıtýsııasynyń normalary belgilengen josparlardy nátıjeli iske asyrý úshin barlyq zańdy múmkindik pen jetkilikti resýrstarǵa ıe», dedi akademık.
Konferensııanyń moderatory – Saıası zertteýler ortalyǵynyń dırektory, fılosofııa ǵylymdarynyń kandıdaty Aıdar Ámirebaev konstıtýsııalyq jańǵyrtýdyń úderisteri men perspektıvalaryna qatysty pikir almasý jáne oǵan qatysty kásibı usynystardyń bolýy zańdylyq ekenin alǵa tartty. Konstıtýsııa tarıhyna toqtalǵan sarapshy «Qazaqstan halqy osy mańyzdy qujat negizinde ekonomıka men áleýmettik-saıası júıeni jańǵyrtýda, egemendik pen táýelsizdikti nyǵaıtýda úlken tarıhı joldardy eńserdi», dep atap ótti. «Osy jyldar ishinde elimizdiń ekonomıkalyq irgetasy qalyptasty. Qazaqstan postkeńestik keńistiktegi kóshbasshylardyń biri, halyqaralyq qoǵamdastyqtyń bedeldi múshesine aınaldy. Desek te, búginde elimizdiń aldynda kúrdeli geosaıası jaǵdaılar men táýekelderge baılanysty jańa mindetter tur. Bul jaǵdaıda el Prezıdentiniń bastamasy boıynsha qabyldanǵan qoldanystaǵy Konstıtýsııaǵa engiziletin túzetýler sheshýshi rólge ıe. Elimizdiń jańartylǵan Konstıtýsııasy kúshti Parlamenti bar Prezıdenttik basqarýǵa jol ashýǵa tıis. Bul rette otandyq ıntellıgensııa men ǵylymı-sarapshylyq qoǵamdastyqtyń jetekshi ókilderi bastalǵan «Jańa Qazaqstan» jalpyulttyq jobasyn tabysty iske asyrýǵa ózderiniń zor kásibı úlesterin qosýǵa múddeli», dedi ortalyq dırektory.
Konferensııa barysynda Qoǵamdyq damý basqarmasy basshysynyń orynbasary A.Temenov, zań ǵylymdarynyń doktory, professor, Eýropalyq quqyq jáne adam quqyqtary saraptamalyq ınstıtýtynyń dırektory M.Báshimov, M.Áýezov atyndaǵy Ádebıet jáne óner ınstıtýtynyń bólim meńgerýshisi S.Ananeva, Sh.Ýálıhanov atyndaǵy Tarıh jáne etnologııa ınstıtýty dırektorynyń ǵylymı jumystar jónindegi orynbasary Sh.Tileýbaev, «Qoǵamdyq kelisim» RMM bas sarapshysy G.Bilálova, FSDI bas ǵylymı qyzmetkeri, professor R.Qadyrjanov konstıtýsııalyq jańǵyrtý úderisteriniń taldamalyq máni men perspektıvalaryna qatysty usynystaryn bildirip, ishki saıası prosesterdi damytýdyń erekshelikterine qatysty oılarymen bólisti.
Sarapshylardyń pikirinshe, ashyq qoǵamda árbir azamattyń pikiri qundy. Jastardyń óz quqyqtary men bostandyqtaryna kepil bola alatyn elde ómir súrýi eldiń keleshektegi tabysty damýyna yqpal etetini sózsiz. Bul baǵytta Prezıdenttiń ózi eskilikten arylý qajettigin alǵa tartyp otyr. Eldiń jańǵyrýy onyń azamattarynyń bilimi, densaýlyǵy, quqyǵy eskerilgen turaqty konstıtýsııalyq orta qalyptasqanda ǵana oryndalatyny anyq. Al mundaı qadam kásibı qoǵamdastyqtyń qoǵammen ashyq jumys isteýi, memlekettik apparattyń halyq únine qulaq asýymen tyǵyz baılanysty ekenin qaperde ustaý qajet.
ALMATY