9 mamyrda bastalǵan jel kún ótken saıyn kúsheıe tústi. Alataý men Qarataý túıisken tórdegi aýdandar men aýyldarda, ásirese, Shymkent shaharynda daýyl uıytqyp, jeldiń jyldamdyǵy munda11-12 mamyrda sekýndyna 25 metrge jetti.
Oblys ortalyǵynda keı kezderi sekýndyna 28 metrden asqan qýatpen soqqan dúleı daýyl birtalaı zııan keltirdi. Kópqabatty jáne jeke úılerdiń shatyrlary ushyp, aǵashtar tamyrymen opyrylyp qulaǵan tustar da bar. «Nursát» shaǵyn aýdanyndaǵy birtalaı úıler zardap shekti. Shymkent haıýanattar baǵynda aǵash basyp qalǵan, 1962 jyly dúnıege kelgen azamat qaza tapty. Keıbir kósheler men saıabaqtarda qulaǵan aǵashtar mashınalardy qıratty.
Qala ákimdigi tótenshe jaǵdaı jarııalap, mektepter men balabaqshalar jumysy bir kúnge toqtatyldy. 12 mamyrda oblys ákimi Asqar Myrzahmetov tótenshe jaǵdaılar jónindegi arnaıy shtab májilisin ótkizip, oǵan barlyq tıisti salalar basshylary, ákimder qatysty. Shuǵyl sharalar belgilenip, arnaýly tapsyrmalar berildi. Shymkentte jáne onyń mańaıyndaǵy aýdandarda tótenshe jaǵdaılar mekemeleriniń qyzmeti jan-jaqty kúsheıtildi.
Jel jeti kúnde, ıaǵnı 15 mamyrda tolastaıdy degen boljam bar.
Marhabat BAIǴUT,
«Egemen Qazaqstan».
ShYMKENT.