Jeńis kúni merekesine arnalyp Taldyqorǵanda ulttyq at sport túrlerinen dúbirli doda ótti. Almaty oblysynyń ákimi Ańsar Musahanovtyń ókimimen uıymdastyrylǵan taı, qunan, jorǵa jarys, top, alaman báıgelerdiń arasynda qyz qýý, aýdaryspaq, teńge ilý, kókpar tartý syndy ulttyq oıyndar da belgilengen ýaqytta talapqa saı oınaldy. Mundaǵy basty maqsat – ulttyq at sporty oıyndaryn damytý, ulyqtaý jáne nasıhattaý boldy.
Aldymen taı jarysy bastalyp ketti. Álginde ǵana aýyzdyqtarymen alysyp, tizgin ustaǵan balany ala qashyp, bir orynda baıyz taba almaı turǵan taılar 3 shaqyrymǵa jiberilip, máre syzyǵyn birinshi bolyp kesip ótken Kóksý aýdanynyń «Baqtumar» atty tory taıy 150 myń teńgeni jeńip aldy. Lezde bastalǵan qyz qýý halyqty qyzyqtyra, áp-sátte qatar otyrǵan adamdar ul men qyzdy jaqtap ekige bóline qalǵanynyń ózi bir ǵanıbet. Quıǵyta shaýyp qyzdy qýyp jetip qypsha belden qysa ustap, betten súıip úlgergen jigit qaıta burylyp mejeli jerge jetkenshe jon arqasynan qyz birneshe ret qamshy salyp, eldi kúlkige bóleı bildi. 9 shaqyrymdyq qunan báıgede Kerbulaq aýdanynyń «Maralqasqasy» bas júldeni jeńip alsa, 15 shaqyrymdyq top báıgede Balqash aýdanynan kelgen «Qońyróleń» degen at ozyp shyqty. Jorǵa jarysta Eńbekshiqazaq aýdanynyń «Vesvolt» atty tulpary bas báıgeni utyp aldy. 21 shaqyrymdyq alaman báıgede Eskeldi aýdanynan ákelgen «Myńqasar» degen tulpar ózge attardan oq boıy oza shaýyp bas báıgege tigilgen temir tulpardy ıesine utyp berdi.
Nurbol ÁLDIBAEV,
«Egemen Qazaqstan».
TALDYQORǴAN.