2023 jyldyń 1 qańtarynan bastap jumysynan aıyrylǵan jaǵdaıda Memlekettik áleýmettik saqtandyrý qorynan tólenetin áleýmettik tólem mólsheri 13%-ǵa ósedi, dep habarlaıdy Egemen.kz Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Memleket basshysynyń osy jylǵy 1 qyrkúıektegi Qazaqstan halqyna Joldaýynda aıtylǵan tapsyrmasyn oryndaý maqsatynda áleýmettik saqtandyrý júıesin damytýdyń osy jáne basqa da sharalary QR Áleýmettik kodeksiniń jobasynda qarastyrylady.
Qoldanystaǵy zańnamaǵa sáıkes jumystan bosatylyp jáne jumyssyz retinde tirkelgender mindetti áleýmettik saqtandyrý júıesine qatysý ótiline jáne sońǵy 24 aıdaǵy tabysyna baılanysty jumysynan aıyrylý boıynsha 1 aıdan 6 aıǵa deıin áleýmettik tólemder alady. Bul tólem joǵalǵan tabystyń 40%-na deıingi mólsherde MÁSQ qarajaty esebinen júzege asyrylady.
«Prezıdent tapsyrmasyn oryndaý úshin QR Áleýmettik kodeksiniń jobasynda jumysynan aıyrylǵan jaǵdaıda tólenetin áleýmettik tólemniń mólsherin esepteý úshin tabysty almastyrý koeffısıentin 40-tan 45%-ǵa deıin arttyrý kózdelgen. Nátıjesinde, osy tólemderdiń mólsheri orta eseppen 13%-ǵa ulǵaıtylady», delingen vedomstvo habarlamasynda.
Osy oraıda jumys berýshilerdiń MÁSQ-ke olardyń qyzmetkerleri úshin áleýmettik aýdarymdar mólsherlemesiniń belgilengen mólsheri ózgerissiz qalatynyn atap ótý mańyzdy.
Atalǵan qujatta tabysty joǵaltý boıynsha áleýmettik táýekelderdiń barlyq 6 túri boıynsha, atap aıtqanda: jumysynan aıyrylý, eńbekke qabilettiliginen aıyrylý, asyraýshysynan aıyrylý, júktilikke jáne bosanýǵa baılanysty tabysynan aıyrylý, jańa týǵan balany asyrap alýǵa baılanysty tabysynan aıyrylý, bala bir jarym jasqa tolǵanǵa deıin onyń kútimine baılanysty tabysynan aıyrylý jaǵdaıynda jumyspen qamtylǵan halyqty mindetti áleýmettik saqtandyrýmen qamtýdy keńeıtý kózdelgen.
Áleýmettik saqtandyrý júıesine jumysshylardyń kelesi sanattaryn qosý usynylady:
Azamattyq-quqyqtyq sıpattaǵy sharttar boıynsha tabys alatyn jeke tulǵalar; Internet-platformalar men platformalyq jumyspen qamtýdyń mobıldi qosymshalary arqyly qyzmet kórsetetin jeke tulǵalar. Bul rette ınternet-platforma operatory jeke tulǵa úshin shart boıynsha alynǵan tabystyń 1% mólsherinde áleýmettik aýdarymdar júrgizedi.«MÁSQ qarajaty esebinen jumysynan aıyrylǵan jaǵdaıda tólenetin áleýmettik tólem jumystan bosatylý sebepterine qaramastan júzege asyrylatynyn jáne jumyssyz adam jumys izdep júrgen kezeńde ony qoldaýǵa arnalǵan. Sondyqtan da áleýmettik tólem quqyǵy jumystan bosatylǵan adam jumyssyz retinde tirkelgen kúnnen bastap paıda bolady», dep qosty mınıstrliktiń baspasóz qyzmeti.