Otbasylyq qundylyqtardy dáripteıdi

Osy jarysta bas júldeni jeńip alǵan tabysty da sulý áıel Mrs. Kazakhstan Globe tájin kıip, aty dúrki­regen MRS. GLOBE halyqaralyq baıqaýyna el atynan barady. 1 jeltoq­sannan beri baıqaýǵa qatysýǵa bıznes, bilim, sport, saıasat, mádenıet, qo­ǵam­dyq ómirde jetistikterge jetken 25-45 jas aralyǵyndaǵy kelinshekter ótinish berse, olardyń arasynda úıde otyr­ǵany, azamattyq nekede turyp jat­qany, turmys taýqymetin tartqany, ajyrasqandary da bar...

MRS. Globe Kazakhstan sulýlyq baıqaýynyń uıymdastyrýshysy ári franshıza ıesi Janna Meırembaeva: «Mrs. Globe halyqaralyq sulýlyq baıqaýynyń ótkizilip kele jatqanyna 26 jyl boldy. Osy aralyqta ol óte tanymal jáne áıgili konkýrsqa aınaldy. Endi Qazaqstanda jyl saıyn Mrs. Globe ótkizý múmkindigi týyp otyr. El hanymyn tańdaý – álemniń kóp elinde bar dástúr. Qazaqstanda otbasyna da, óz isine de, damýyna da ýaqyt tabatyn tabysty áıelder jetkilikti. Osy baıqaýda baq synaǵandar tabystyń jańa satysyna kóterilip, bızneste jańa seriktester men ınvestorlar taba alady», deıdi.

Osy bastamaǵa oraı Almatyda ótken bas­pasóz máslıhatynda Prezıdent ja­nyn­daǵy Áıelder isteri jáne demo­gra­fııalyq saıasat jónindegi ulttyq komıs­sııanyń mú­shesi Marıanna Gýrına: «Áıelderdiń qo­lynan kóp nárse keledi. Eger memlekettik bas­qarýǵa áıelder kó­birek tartylsa, elimiz budan da úlken jeńiske jetýi múmkin. Qa­zirdiń ózinde Parlamenttegi áıelder sany 30%-ǵa jýyq. Sondyqtan barlyq qa­ty­sýshylardyń jańa múmkindikterin ashatyn osyndaı baıqaýdyń bar ekenin seziný qýantady», deıdi.

Sonymen baıqaýǵa qatysýǵa úmit bildirgen 300 áıeldiń ishinen 22 konkýrsant irikteýden ótti. MRS. Globe Kazakhstan baıqaýynyń aqtyq syny 8 qazan­da Almatyda ótedi. Sonymen atalǵan jo­banyń daıyndyq kezeńi 4 aıǵa sozylyp, fınalıster talaı sheberlik synyp­tary men trenıngterden ótti. Sheshen­dik ónerdi úırendi, kamera aldynda sóılep, sahnaǵa shyǵýǵa daǵdylandy. Jul­dyzdy spıkerlermen birge jeke brend quryp, áleýmettik jelilerde ózde­rin ádemi kórsetýge beıimdeldi. Sán min­berinde júrý, ıoga jáne etıket sabaqta­rynan ótti. Qarjy sarapshylarymen ­birge maqsat qoıýdy úırendi. Úzdik stılıster, vızajıster men meıkap-mamandar toby baıqaýǵa qatysýshylardy fotosessııalar men túsirilimderge daıyndady.

Qoryta aıtqanda, MRS. Globe Kazakhstan baıqaýy otbasylyq qundy­lyqtardy dáripteýdi, ulttyq mádenı muralardy saqtaý men nasıhattaýdy, eldiń ishki jáne syrtqy týrızmin damytý men ilgeriletýdi de kózdeıdi.

ALMATY