Qazaqstannyń Tuńǵysh Prezıdenti kitaphanasynda 8 qyrkúıek – Halyqaralyq saýattylyq kúnine arnalǵan «Qaǵazǵa til bitirgen...» atty mazmundy kórme bolyp ótti. Mádenı is-sharaǵa halyqaralyq dıplomatııalyq korpýs pen oqý oryndarynyń, qoǵamdyq jáne akademııalyq kitaphananyń, sondaı-aq qoǵamdyq uıymdardyń ókilderi qatysty.
Kórmeniń ashylýynda Tuńǵysh Prezıdent kitaphanasynyń dırektory Baqytjan Temirbolat is-sharanyń mańyzyna toqtala kelip: «Adamzat órkenıetiniń damýy jazýmen tyǵyz baılanysty. Onyń shamamen 6 myń jyl buryn paıda bolýymen adamzat tarıhynda tóńkeris boldy. Jazý adamdarǵa bilimderdi jınaqtap, ony keıingi urpaqqa qaldyrýǵa múmkindik berdi. Jazýmen qatar jazba materıaldary da, máselen, jartastaǵy jazýlar, saz taqtaıshalar, papırýstar, pergamentter, aǵash taıaqshalar, qylqalamdar, qaýyrsyndar men sharıkti qalamdardan qazirgi zamanǵy gadjetterge deıingi uzaq damý jolynan ótti. Búgingi bizdiń kórmemizden memlekettiń joǵary laýazymdy tulǵalary paıdalanǵan zattar men túrli halyqtar mádenıetiniń ozyq úlgilerin tamashalaı alasyzdar», – dep atap ótti. Odan keıin sóz alǵan jazýshy, Memlekettik syılyqtyń laýreaty Álibek Asqar: «Qazirgi jas urpaq qaǵaz, kitap sııaqty dástúrli bilim kózderin paıdalana otyryp, aqparat alýǵa kóbirek kóńil bóledi dep senemin», – dep, osyndaı tanymdyq kórmeni ótkizýge atsalysqan azamattarǵa alǵysyn aıtty.
Kórme eki bólimnen turady: onyń birinshi bóliminde Tuńǵysh Prezıdenttiń jeke kolleksııasynan mańyzdy memlekettik qujattarǵa qol qoıǵan jazý quraldary men ústel quraldary usynylsa, ekinshi bólimde shet memleket kóshbasshylarynyń, kórnekti memleket qaıratkerleriniń, halyqaralyq uıymdardyń dıplomatııalyq syılyqtary qoıyldy.