Búgin Abaı oblysynyń ákimi Nurlan Uranhaev jáne Tótenshe jaǵdaılar vıse-mınıstri Marat Kúldikov dala órtin sóndirý kezinde kúıik shalyp, qaza tapqan órt sóndirýshi Aıdos Toǵyzbaevtyń otbasyna QR Prezıdentiniń atynan III dárejeli «Aıbyn» ordenin tabystady, dep habarlaıdy Egemen.kz oblys ákimdiginiń baspasóz qyzmetine silteme jasap.
Sonymen qatar 3 bólmeli páterdiń sertıfıkaty da berildi. Júzdesý barysynda Aıdos Toǵyzbaevtyń órtpen kúres kezinde kórsetken batyldyǵy men janqııarlyq erligi jaıly aıtyldy.
«Aıdos Toǵyzbaevtyń batyldyǵy men batyrlyǵy, qaısarlyǵy men óz qyzmetine adaldyǵy barshamyzǵa úlgi-ónege bolyp qala bermek. Antyna adal Aıdos baýyrymyz boıynda dál osyndaı qasıetter baryn erligimen dáleldep ketti. Men, Abaı oblysy turǵyndarynyń jáne jeke ózimniń atymnan marqumnyń joldasyna, týǵan týystaryna taǵy bir márte qaıǵyryp kóńil aıtamyn», dedi Abaı oblysynyń ákimi Nurlan Uranhaev.