Namysqa tyrysqan jas balýandardyń erligin kórgende álemdik dodalarda jaýyryny jer ıiskep qaıtqan jigitterdiń aldyn orar batyrlardyń kele jatqanyn ańdaısyz. Olar áli bala, biraq osy qarqynynan qaıtpasa 23 jyl qorjynǵa túspegen altyndy qanjyǵaǵa salary anyq. Bul oıǵa sport ardageri Sádýaqas Qojasbaevty eske alýǵa arnalǵan dástúrli spartakıadada keldik.
Jyl saıyn jastardyń basyn qosatyn sport dodasy Sarqan aýdanynda ótti. Bul ıgilikti is-shara Qojasbaevtar otbasynyń demeýshiligimen ári aýdan ákimdiginiń qoldaýymen uıymdastyryldy. Atalǵan sporttyq jarysqa Jetisý oblysynyń túkpir-túkpirinen, sondaı-aq Almaty qalasy men Almaty oblysynan 1000 sportshy qatysty. Jarystyń jalpy júlde qory 7 mln teńgeni qurady.
Spartakıada baǵdarlamasyna jasóspirimder arasyndaǵy erkin kúres jáne djıý-djıtsý, qol kúresi, erler arasyndaǵy voleıbol, erler men ardagerler arasyndaǵy shaǵyn fýtbol, sondaı-aq jalpy marafon túrleri kirdi.
Aıta keter bolsaq, Sarqan aýdanynda týyp-ósken Qojasbaevtar otbasy aýdannyń qoǵamdyq ómirine belsene atsalysyp, memleket-jekemenshik áriptestigi aıasyndaǵy jobalar men bıznes-jobalardy júzege asyrýǵa qoldaý bildirip, jerlesterine áleýmettik qoldaý men jastardyń buqaralyq sportyn damytýǵa erekshe kóńil bólip keledi.
Máselen, sońǵy jyldary Qojasbaevtar otbasy Sarqan qalasynda 8 sport alańyn salyp berdi. Oblystyq máslıhattyń depýtaty retinde kásipker Rýslan Qojasbaev mesenattyqpen aınalysyp, óńirdiń damýyna óz úlesin qosyp júr.
Jetisý oblysy