Elordadaǵy Nursultan Nazarbaev halyqaralyq áýejaıynda ekinshi ushý-qoný jolaǵyn salý josparlanýda. Bul týraly «Nursultan Nazarbaev» halyqaralyq áýejaıy basqarma tóraǵasynyń orynbasary Dáýlet Hamzın áýe aılaǵyn damytý tujyrymdamasynyń tusaýkeserinde aıtty, dep habarlaıdy Egemen.kz.
Elordadaǵy halyqaralyq áýejaıdyń qazirgi ushý-qoný jolaǵy 2003 jyly qaıta jańǵyrtylyp, sodan beri jańartylmaǵan. Bıyl munda kúrdeli jóndeý jumystary júrgizildi. Degenmen, áýe qozǵalysynyń qarqyndylyǵynyń artýyna jáne áýejaıdy damytý josparyna baılanysty kásiporyn basshylyǵy aerodrom ýchaskesin jańadan qaıta qurý qajettigin aıtty.
«Biz 2027-2028 jyldarǵa qaraı ushý-qoný jolaǵynyń qozǵalysyn arttyrýdy kózdep otyrmyz. Ushý-qoný jolaǵyn, taksı joldary men perrondy, sondaı-aq jaryqtandyrý jabdyqtaryn qaıta jóndeýdi josparlap otyrmyz. Ushý-qoný jolaǵyn jóndeý ýaqytsha qolaısyzdyqtar týdyrady, biraq biz máseleni sheshemiz», dedi «Nursultan Nazarbaev halyqaralyq áýejaıy» AQ basqarma tóraǵasynyń birinshi orynbasary Dáýlet Hamzın.
Onyń aıtýynsha, Astana áýe aılaǵy 2023 jyldan bastap jolaýshylar tasymaly men oryndalatyn reıster sany boıynsha Qazaqstandaǵy eń iri áýe aılaǵy bolýy kerek. Sondaı-aq aldaǵy 5 jylda júk tasymaldaý kólemin tórt esege ulǵaıtý josparlanýda.