Pavlodar oblysynyń Aqtoǵaı aýdanynda 1 200 bas iri qaraǵa arnalǵan taýarly sút fermasy ashyldy. Jańa ferma óńirdiń ishki naryǵyn aǵarǵanmen tolyq qamtamasyz etýge qaýqarly.
«Aqtoǵaı-Agro» JShS-nyń negizinde ashylǵan jańa kásiporynda jylyna 10 myń lıtr sút saýylady. Seriktestiktiń bas dırektory Aleksandr Terentev qazirgi tańda munda Slovakııadan sút jáne et baǵytyndaǵy sımmental tuqymdy 93 iri qara jetkizilgenin aıtyp ótti. Jyl sońyna deıin taǵy myńnan asa sıyr ákelý josparlanyp otyr.
Áleýetti fermanyń ashylýyna qatysqan Aýyl sharýashylyǵy mınıstri Erbol Qarashókeev pen oblys ákimi Ábilqaıyr Sqaqov jobanyń mańyzdylyǵyn atap, ujymǵa tabys tiledi.
Jalpy, óńirdegi 36 taýarly sút fermasynyń úshten biri sońǵy eki jarym jyl ishinde iske qosylǵan. Sonyń arqasynda qosymsha 38 myń tonna sút óndiriledi. Bul jobalarǵa 43 mlrd teńge ınvestısııa bólinip, aýyldyq jerlerde 500-den astam jańa turaqty jumys oryndary ashyldy. Aldaǵy ýaqytta taǵy osyndaı 8 ferma paıdalanýǵa beriledi dep kútilýde. Munyń barlyǵy óńirdegi sýarmaly alqaptardy ulǵaıtýdyń nátıjesi. Sharýashylyqtar sýarmaly tanaptar arqyly qunarly mal azyǵyn jetkilikti daıyndaýǵa kóshti.
Aqtoǵaıda paıda bolǵan jańa kásiporynnyń qurylysyna 6 mlrd teńgeden astam ınvestısııa quıylǵan. Fermada qazirgi kúni 90 adam jumys isteıdi. Sýarmaly alqapty damytý jumystaryn júıeli júrgizetin «Aqtoǵaı-Agro» JShS byltyr kartoptyń 9 túrin jáne júgeriniń jańa suryptaryn ósirýdi qolǵa alǵan. Munda malǵa arnalǵan jemshóp bazasyn qurý maqsatynda júgeriniń gıbrıdti túrleri de ósiriledi.
Ertis-Baıan óńiriniń agroónerkásip kesheninde 2025 jyldyń sońyna deıin 100-den astam ınvestısııalyq jobany ómirsheń etý josparlanǵan. Oǵan 180 mlrd teńge ınvestısııa quıylmaq.
Pavlodar oblysy,
Aqtoǵaı aýdany