Premer-Mınıstr Álıhan Smaıylov Dúnıejúzilik densaýlyq saqtaý uıymynyń Eýropalyq óńirlik bıýrosynyń dırektory Hans Klıýgemen kezdesip, densaýlyq saqtaý júıesin odan ári damytý máselelerin jáne Qazaqstannyń medısına salasyndaǵy halyqaralyq bastamalaryn talqylady, dep habarlaıdy Egemen.kz Úkimettiń baspasóz qyzmetine silteme jasap.
Taraptar Úkimettiń (Qazaqstan) medısınalyq qyzmetterdiń sapasyn arttyrý jáne qamtýdy keńeıtý jónindegi sharalardy, koronavırýsqa qarsy otandyq QazVac vaksınasyn tirkeý jáne eksporttaý, medısına qyzmetkerleriniń kásibı jaýapkershiligin saqtandyrý, olardyń mártebesi men áleýmettik qorǵalýyn nyǵaıtý, sondaı-aq DDU Eýropalyq óńirlik komıtetiniń 73-sessııasyn 2023 jyly Astanada ótkizý máselelerin talqylady.
Premer-Mınıstr Qazaqstan DDU-nyń Ulttyq densaýlyq saqtaý júıesin jaqsartý jónindegi jumysyn tolyq qoldaıtynyn, sondaı-aq Uıymnyń koronavırýs pandemııasyn tıimdi eńserýge qosqan úlesin baǵalaıtynyn atap ótti.
«Biz yntymaqtastyǵymyzdy jalǵastyrýǵa jáne barlyq basym baǵyttar boıynsha tájirıbe almasýǵa daıynbyz», dedi Álıhan Smaıylov.
Onyń aıtýynsha, aldaǵy jyldary Úkimet densaýlyq saqtaý salasy qyzmetkerleriniń jalaqysyn kezeń-kezeńmen arttyrýdy, medısınalyq ınfraqurylymdy, onyń ishinde aýyldyq jerlerde jańartýdy, beıindi bilimdi nyǵaıtýdy jáne ǵylymı zertteýlerdi qarjylandyrýdy keńeıtýdi jalǵastyrady.
О́z kezeginde Hans Klıýge DDU Qazaqstannyń densaýlyq saqtaý salasyndaǵy, atap aıtqanda, halyqtyń medısınalyq qyzmetterge qoljetimdiligin keńeıtý jáne sala qyzmetkerleriniń áleýmettik jaǵdaıyn qamtamasyz etý jónindegi basymdyqtaryn qoldaıtynyn atap ótti.
«Bizdiń oıymyzsha, densaýlyq saqtaý jáne áleýmettik medısınalyq saqtandyrý júıelerin qarjylandyrýdy ulǵaıtý jónindegi sharalar durys. Bul - ilgeri jasalǵan úlken qadam. Atalmysh tájirıbe Qazaqstanǵa osy salany odan ári damytý úshin paıdaly bolady dep úmittenemiz», dedi Hans Klıýge.