Jyldy jańadan saılanǵan prezıdentpen aıaqtaǵaly otyrmyz. Negizi, saılaý ótetini týraly keıbir sarapshylar ashyq aıtyp ta júrdi. Ondaı boljam jasaýǵa saıası-áleýmettik oqıǵalardyń sebep bolǵanyn joqqa shyǵara almaımyz.
«Kezekten tys prezıdent saılaýy nege qazir jarııalandy?» degen suraqqa kelsek, bul máseleniń tamyryna tereń úńilý qajet. Sebebi onyń saıası máni asa zor. Buǵan deıin eldegi saıası, ekonomıkalyq jáne áleýmettik reformalardyń negizi eki Joldaýda ashyq aıtyldy. Ony kókiregi oıaý, kózi ashyq qoǵam kórip, bilip otyr. Buǵan qosa, Ata Zańymyzǵa ózgeristerdi referendým arqyly bekittik. Endi «Osy reformalardy halyq qoldaı ma?» degen suraq týyndaıdy. Al bul úshin saılaý kerek.
Munyń syrtynda taǵy bir qaýip bar. Atap aıtqanda, saıası qaýqarynan aıyrylyp, ekonomıkalyq áleýeti shektelip jatqan kúshterdiń el tutastyǵyna syna qaǵý múmkindigi. Budan bólek, syrtqy dúnıe de tynshymaı tur. Jalpy, salmaqtap, saralap qarasaq, osy jyl elimiz úshin óte kúrdeli kezeń boldy. Osynyń barlyǵy prezıdent saılaýyn jarııalaǵan Memleket basshysynyń logıkasyn túsindirip beredi.
Prezıdent saılaýynan soń Parlament saılaýy bar. Májiliste jańa esimderdi kóremiz degen úmit bar. Jańa adamdar, jańa lep kelip, Parlamenttiń yqpalyn kúsheıtkeni durys. Jańarǵan Parlament Úkimetke de tyń serpin ákeleri anyq. Osylaısha, Prezıdent, Parlament, Úkimet qaıta túlep, reformalardy iske asyrýǵa bel sheshe kirispek. Senim mandatyna ıe bolǵan soń reformalardy alańsyz iske asyrýǵa da múmkindik týady.
Qoǵamnyń kútetini – ádil saılaý. Erteń úmitkerlerdi tirkeý bastalady. Biraq, saılaýǵa qatysý úshin qarjylyq, áleýmettik, ıntellektýaldyq áleýet kerek ekenin eskerýimiz qajet. Tanymaldylyq ta kerek. Úmitkerdiń bedeli, aıqyn baǵdarlamasy bolýy tıis.
Bul saılaý «Jańa Qazaqstan» dep atalǵan dáýirdegi jańa saılaý bolmaq. Osy saılaýdan bastap, prezıdentti tek bir merzimge saılaımyz. Sondaı-aq jańa saılaý bıýlleteninde «barlyǵyna qarsymyn» degen baǵan engiziledi.
Saılaý ótkizilgen saıyn el dúrligedi. Bul – qalypty qubylys. Eń bastysy, álemdegi ahýal kúrdelenip, qaýipsizdik máselesi kún tártibinen túspeı turǵan qazirgideı ýaqytta osyndaı saıası is-sharalar memlekettigimizdi bekite tússe deımiz.
Eldos JUMAǴULOV,
E.Bóketov atyndaǵy Qaraǵandy ýnıversıteti
Saıasattaný jáne áleýmettaný kafedrasynyń meńgerýshisi