Elordadaǵy Roza Baǵlanova atyndaǵy «Qazaqkonsert» memlekettik konserttik uıymynda Qazaq memlekettik sımfonııalyq orkestriniń «Andrea Bochellıdiń repertýaryndaǵy áıgili arııalar men ánder» atty keremet kesh ótti.
Osyndaı konsert byltyr Parsy shyǵanaǵyndaǵy Dýbaıdaǵy otelderdiń janyndaǵy úlken alańqaıda ashyq aspan astynda bolǵan. Onda A.Bochellıdi Qazaq memlekettik sımfonııalyq orkestri men onyń kórkemdik jetekshisi, Qazaqstannyń Eńbek Eri Aıman Musaqojaeva súıemeldep, «Parus-2021» festıvaliniń kórermenderin jyly áserge bóledi. Muny sonyń jalǵasy deı alamyz.
Jalpy, Qazaq memlekettik sımfonııalyq orkestri – elimizdegi úzdik mýzykalyq ujymdardyń biri. Onyń quramynda qazirgi zamanǵy qazaqstandyq mýzykalyq ónerdi halyqaralyq deńgeıde nasıhattap, kameralyq mýzykanyń álemdik dástúrin jalǵastyrýshy joǵary kásibı mýzykanttar, halyqaralyq baıqaýlardyń laýreattary bar. Orkestrge Qazaqstannyń eńbek sińirgen qaıratkeri Baqytjan Musaqojaeva dırıjerlik etedi.
Konsertke Qazaqstannyń eńbek sińirgen qaıratkeri Bıbigúl Januzaq (soprano), halyqaralyq baıqaýlardyń laýreaty Artýr Ǵabdıev (tenor) jáne Qazaq ulttyq óner ýnıversıtetiniń «Vokaldyq óner» kafedrasynyń oqytýshylary men stýdentteri qatysty.
Kesh barysynda Dj. Bızeniń «Karmen» operasyna ývertıýra, Dj.Verdıdiń «Rıgoletto» operasynan Mantýıa gersoginiń arııasy, Dj.Pýchchınıdiń «Muń» operasynan arııa, Dj.Pýchchınıdiń «Djannı Skıkkı» operasynan arııa, Dj.Rossınıdiń «Suǵanaq saýysqan» operasynyń ývertıýrasy syndy álemdik mýzykalyq klassıkanyń úzdik týyndylary usynyldy.