Batys Qazaqstan: kóshi-qon ahýaly

Batys Qazaqstan oblystyq kóshi-qon polısııasy jáne jergilikti ákimdik jaǵdaıdyń tolyq baqylaýda ekenin aıtady. Polısııa departamentiniń málimetinshe, jyl basynan beri Batys Qazaqstan oblysynyń aýmaǵynda Reseı Federasııasynyń 12 265 azamaty tirkelgen. Olardyń 1 047-si – halyqaralyq júk tasymalymen, 1 108-i jumys isteýge kelgen. Al jeke sharýalarymen kelgen 10 057 reseıliktiń 2 417-si Qazaqstanda ýaqytsha turýǵa ruqsat alǵan. Budan bólek, 22 azamat – oqýǵa, 18 azamat – qyzmet baby boıynsha, 13 azamattyń týrıstik saparmen kelgeni tirkelipti.

«Reseı Federasııasy azamat­tarynyń bizdiń elde bolý tártibi 2005 jylǵy 23 mamyrda bekitilgen «Qazaqstan Respýblıkasy men Reseı Federasııasy azamat­tarynyń ózara vızasyz saparlary týraly» Qazaqstan Respýblıkasy Úkimeti­niń №494 qaýlysymen retteledi. Oblystyq kóshi-qon bólimshelerin­de 2022 jyldyń basynan 22 qyrkúıegine deıin barlyǵy 20 840 sheteldik tirkeldi. Onyń ishinde 18 548 azamat – TMD elderinen, 2 292 azamat alys shetelderden kelgen» delingen polı­sııa taratqan málimette.

Qazirgi tańda Batys Qazaqstan oblysynyń aýmaǵynda Reseı Federa­sııasynyń 3 961 azamaty turaqty túrde turady. Osy jyldyń basynan beri Qazaqstanda turaqty turýǵa qaldyrý týraly 427 adam ótinish bildirgen bolsa, onyń 278-i ruqsat alǵan. Sonymen qatar Qazaqstan azamattyǵyn alýǵa 29 azamat ótinish bildirse, onyń 11-i Qazaqstan Respýb­lıkasynyń azamattyǵyn alǵan.

Batys Qazaqstan oblystyq polısııa departamenti jýrnalıs­terdiń suraýy boıynsha sońǵy úsh kúnniń málimetin de jarııalady. Reseıde ishinara mobılızasııa jarııalanǵan 21 qyrkúıek kúni kedennen Batys Qazaqstan oblysy aýmaǵyna – 64 Reseı azamaty, 22 qyrkúıekte – 128, 23 qyr­kúıekte 197 azamat ótken kórinedi. Kó­rip otyr­ǵanymyzdaı, ósý dınamıkasy bar.

2021 jyldyń qańtar-qyrkúıek aılarynda Batys Qazaqstanǵa Reseı Federasııasynyń 5 882 azamaty kelgen bolsa, bıylǵy toǵyz aı ishinde 12 265 reseılik azamat qazaq shekarasyna ótken. Sonyń 1 307-si qyrkúıek aıynda kelgen.

Batys Qazaqstan oblysy