Memleket basshysy Qasym-Jomart Toqaev Túrkistan oblysyna sapary aıasynda óńir jurtshylyǵymen kezdesip, eldegi ózekti máselelerge toqtaldy, dep habarlaıdy Egemen.kz Prezıdenttiń baspasóz qyzmetine silteme jasap.
«Men «Ulttyq qor – balalarǵa» atty jańa baǵdarlama qabyldaýdy usyndym. Biz qordyń jyl saıynǵy ınvestısııalyq tabysynyń teń jartysyn balalardyń esepshotyna aýdaratyn bolamyz. Bul qarjyny olar kámelet jasyna tolǵannan keıin baspanaǵa nemese bilim alýǵa jumsaı alady. Osy sheshim ulttyq tabysty ádil bólý qaǵıdatyna saı keledi dep esepteımin. Atalǵan sharalardyń bári óskeleń urpaqtyń bolashaǵyna arnalady», dedi Memleket basshysy Qasym-Jomart Toqaev.
Sondaı-aq jıyn barysynda Qasym-Jomart Toqaev Májilis pen máslıhat jumysyndaǵy, Parlament qyzmetindegi ózgeristerge toqtaldy.
«Biz qazir Ádiletti Qazaqstandy qurýǵa kiristik. Sońǵy jyldary túbegeıli ózgerister jasap, elimizdi jańǵyrtýdy qolǵa aldyq. Maýsym aıynda ótken referendým halyqtyń bul bastamalardy qoldaıtynyn kórsetti. Saıası reformalar elimizde «kúshti Prezıdent – yqpaldy Parlament – esep beretin Úkimet» qaǵıdatyn ornyqtyrdy. Bul Prezıdenttik Respýblıka bolamyz degen sóz. Rasynda, el basqaratyn Prezıdent quzyrly, kúshti bolýy kerek. Áıtpese, keıbir basqa elderdegi sııaqty tártipsizdikke ushyraýymyz múmkin. Al, ondaı jaǵdaı halqymyzǵa qasiret ákeledi. Budan bylaı Májilis pen máslıhattar aralas júıe boıynsha jasaqtalady. Bılik tarmaqtary arasynda tepe-teńdik ornatý úshin naqty sharalar qabyldandy. Prezıdenttiń birqatar ókilettigi Parlamentke berildi. О́ńir basshylary balamaly jolmen tańdalatyn boldy. Aýyl ákimderin tikeleı saılaý tásili engizildi», dedi ol.
Gúlim Sadyrbek