Qazirgi kezde eń ózekti taqyryptardyń biri – halyqtyń qarjylyq saýatyn arttyrý jaıy. Bul rette jýrnalısterge artylatyn mindet úlken. Jurtshylyqtyń qarjylyq saýatyn kóterý úshin tilshiniń ózi bul salanyń uńǵyl-shuńǵylyn táýir bilýi shart. Osy oraıda Jusan Bank pen Medialab kommýnıkasııa agenttigi birlesip ıgilikti sharany qolǵa aldy.
«Bank jáne ınvestısııa salasyndaǵy jýrnalıstıka» taqyrybyndaǵy trenıngke elimizdiń ár óńirinen qarjy, ınvestısııa, ekonomıka taqyrybyn qaýzap júrgen 30-dan astam jýrnalıst jınaldy. Eki kúnge sozylǵan trenıngke bank ókilderi, jýrnalıster, sarapshylar kelip, bilgenimen bólisti.
Atap aıtqanda, is-sharanyń alǵashqy kúninde Qazaqstan qarjygerler qaýymdastyǵy tutynýshylar quqyqtaryn qorǵaý jónindegi dırektory Lázzat Úsenbekova, Jusan ınvest korporatıvtik qarjy departamentiniń vıse-prezıdenti Aıa Aldabergenova, Jusan ınvest iri klıenttermen jumys departamentiniń vıse-prezıdenti Áıgerim Moldabekova jáne Forbes Kazakhstan jýrnaly qazaq nusqasynyń bas redaktory Baqytjan Buqarbaı arnaıy dáris oqysa, ekinshi kúnde Jusan analytics redaktory Aıbota Japparbergen, Ulttyq banktiń aqparat jáne kommýnıkasııalar departamentiniń dırektory Asan Ahmetjan jáne Lsm.kz bas redaktory Aınur Kargalınova tyń aqparattardy alý, qarjy taqyrybyndaǵy materıaldardy jazýdyń qyr-syryn úıretti.
«Qarjynyń kúndelikti ómirde qanshalyqty mańyzdy ekeni, onyń árbir otandasymyzdyń ómir súrý deńgeıine qalaı yqpal etetini bárimizge málim. Degenmen óz qarjysyn durys paıdalanyp, aqshany tek jumsap qana qoımaı, ony saqtap, kóbeıtý joldaryn kez kelgen adam bile bermeıdi. Qarjy quraldary týraly aqparatty qarapaıym tilmen halyqqa túsindirip, durys baǵyt berýde jýrnalıstermen birge jumys isteıtin bolsaq, árbir qazaqstandyq óz qarjysyn eseleı túsetinine kámil senemin. Jýrnalısterdi halyq pen bıznes arasyn jalǵap turǵan altyn kópir dep bilemin», dedi «Jusan Bank» AQ basqarma tóraǵasy Nurdaýlet Aıdosov.